GTA 6 pritet të sjellë fitime rekord, parashikohen miliona porosi paraprake
Champions League hyn në territorin e saj më të shenjtë; aty ku përqindjet peshojnë, por historia flet më fort. Super-kompjuteri i Opta ka llogaritur shanset për ndeshjet e kthimit të çerekfinaleve, duke nxjerrë favoritë të qartë, por edhe duele ku matematika nuk mjafton për të shpjeguar gjithçka.
Në Mynih, përballja mes Bayernit dhe Real Madridit është shembulli perfekt. Gjermanët kanë 83.68% shanse kualifikimi pas 2-1 në ndeshjen e parë, ndërsa madrilenët vetëm 16.32%. Në simulime, Bayerni fiton 56.7% të rasteve, barazimi është 20.3% (i mjaftueshëm për kualifikim), ndërsa Reali fiton në 23%. Megjithatë, për të kaluar, spanjollëve iu duhet fitore me më shumë se një gol.
E vështirë edhe për Barcelonën që, pas 2-0 ndaj Atlético Madridit ka vetëm 20.39% shanse për kualifikim, kundrejt 79.61% të “rojiblancos”. Në 10.000 simulime, Barça ka 50.4% shanse për fitimin e ndeshjes, por kjo nuk mjafton gjithmonë për kualifikim. Ndërkohë, PSG dhe Arsenali duken më pranë gjysmëfinaleve. Parizienët kanë avantazh 2-0 ndaj Liverpool, ndërsa Arsenali dominon përballjen me Sporting CP.
Megjithatë, historia tregon se si Real Madridi, edhe Barcelona nuk mund të shpallen kurrë të eliminuar para kohe. Shifrat ulin shanset, por nuk matin dot peshën emocionale të një nate të madhe europiane. /Telesport.al/
Flick: Jemi në rrugën e duhur, besojmë në forcat tona dhe synojmë një “remuntada”
Trajneri i Barcelonës, Hansi Flick, foli për mediat pak orë para ndeshjes së dytë çerekfinale të Champions League që klubi “blaugrana” do të luajë sot kundër Atlético Madrid.
Katalanasit u mundën 0-2 në shtëpinë e tyre në sfidën e parë, ndaj sot nevojitet një performancë e fortë për të siguruar përmbysjen e kualifikimin. “Nuk jam i shqetësuar. Ajo që dua është të luajmë futboll të mirë”, tha Flick.
“E dimë që mund të mbrohemi shumë më mirë, por është një çështje ekipi. Të gjithë në ekip duhet të jenë të bashkuar; duhet të mbrohemi si një njësi”, deklaroi trajneri gjerman.
Më tej, Flick shtoi: “Pa topin, është shumë e rëndësishme të menaxhojmë hapësirën dhe ta zvogëlojmë atë. Kur e kemi topin, ky është stili ynë i lojës. Bëhet fjalë për përmirësim dhe për të qenë në gjendje të shënojmë gola”.
“Mendoj se mentaliteti dhe qëndrimi janë shumë të rëndësishëm. Ajo që shoh është se skuadra ime ka një lidhje të jashtëzakonshme me tifozët. E kemi parë këtë sezon dhe ka një efekt shumë pozitiv në skuadër sepse, duke parë përpara nesër, çdo lëvizje do të jetë e rëndësishme”, tha Flick.
“Duhet të besojmë në veten tonë, të dimë se mund ta bëjmë. Ndjej se skuadra është në rrugën e duhur. Duhet të jemi të guximshëm. Kemi cilësinë dhe në ndeshje si kjo, zakonisht luajmë më mirë“, përfundoi Hansi Flick. /Telesport.al/
Simeone: Jemi të bindur në forcën tonë, kemi një plan loje që do të na çojë në gjysmëfinale
Atletico Madrid ka një epërsi prej dy golash dhe avantazhin se do të luajë në shtëpinë e saj çerekfinalen e kthimit të Champions League ndaj Barcelona. Pas të gjitha polemikave rreth ndeshjes së parë, ndeshja e sotme do të luhet me shumë entuziazëm dhe do të jetë një ndeshje vendimtare për djemtë e Hansi Flick.
Trajneri i “colchoneros”, Diego Simeone, para ndeshjes sqaroi qasjen e skuadrës së tij në prag të kësaj sfide delikate. Ai e bëri shumë të qartë se ai dhe skuadra e tij kishin një plan të qartë për ta zbatuar, një plan që u jepte atyre një shans të mirë për t’u kualifikuar në gjysmëfinale.
“Jemi të bindur për atë që na duhet dhe çfarë do të kërkojmë. Duhet të luajmë pasi kemi qenë duke konkurruar kundër tyre. E dimë që janë një rival shumë i mirë, por edhe qëllimi ynë, që është kualifikimi. Çdo gjë që imagjinojmë mund të imagjinohet. Pastaj fillon loja dhe gjithçka mund të ndryshojë”, tha Simeone.
Më tej, argjentinasi shtoi: “Pra, besim dhe siguri në atë që duam. Mungesat në mbrojtje? Nuk ka nevojë të flasësh me Robin Le Normand dhe Clement Lenglet, ata e kanë të qartë se çfarë na duhet. Robin po rritet dhe Clement ka shumë përvojë, ai i di virtytet dhe të metat e tij”. /Telesport.al/
