Çfarë fshihet pas përshkallëzimit të fundit të tensioneve Pakistan-Afganistan

Situata mes Pakistanit dhe Afganistanit është përshkallëzuar ndjeshëm këtë javë, pas një ofensive të talebanëve afganë kundër postave ushtarake pakistaneze pranë kufirit, sipas BBC.

Përgjigja e Pakistanit ka përfshirë sulme ajrore mbi Afganistan, duke goditur kryeqytetin Kabul dhe provincat kufitare Kandahar dhe Paktika dhe duke shënuar përshkallëzimin më të madh të tensioneve midis dy vendeve fqinjë që nga armëpushimi i arritur në tetor të vitit të kaluar.

Si nisi përshkallëzimi

Dje në mbrëmje, rreth orës 20:00 lokale, talebanët afganë nisën një ofensivë ndaj vendeve ushtarake pakistaneze përgjatë kufirit, duke operuar në provincat Nangarhar, Nuristan, Kunar, Khost, Paktia dhe Paktika.

Pakistani reagoi brenda disa orësh, duke akuzuar talebanët për “gabim llogaritjeje” dhe për hapje të zjarrtë të paprovokuar ndaj disa vendndodhjeve në provincën Khyber Pakhtunkhwa.

Forcat e sigurisë pakistaneze ndërmorën atë që e quajtën një “përgjigje të menjëhershme dhe efektive”.

Sot në mëngjes, Pakistani kreu sulme ajrore mbi Afganistan, duke goditur bazat në Kabul dhe provincat kufitare.

Ndërkohë, talebanët publikuan – pastaj fshinë – një postim në X, duke thënë se kishin kryer sulme ajrore ndaj pozicioneve pakistaneze në Kandahar dhe Helmand.

Pasojat e përleshjeve

Raportet nga të dyja palët janë kontradiktore dhe vazhdojnë të verifikohen.

Nga ana pakistaneze:

• Ushtria pakistaneze thotë se ka goditur 22 objekte ushtarake në Afganistan, duke përfshirë Kabul dhe Kandahar.
• 12 ushtarë pakistanezë janë vrarë, 27 të tjerë janë plagosur dhe një raportohet i zhdukur.
• Raportohet shkatërrimi i 115 tankeve, mjeteve të blinduara dhe sistemeve të artilerisë.
• Sipas zyrtarëve pakistanezë, të paktën 274 luftëtarë të talebanëve janë vrarë, 73 poste janë shkatërruar dhe 18 janë kapur.

Nga ana talebane:

• Talebanët raportojnë 13 të vrarë dhe 22 të plagosur në radhët e tyre.
• 13 civilë u plagosën dhe numri i civilëve të vrarë mbetet i paqartë.
• Ata akuzojnë Pakistanin për sulme ndaj shtëpive dhe institucioneve civile, duke përfshirë një fermë në Jalalabad dhe një shkollë fetare në Paktika.
• Talebanët gjithashtu pretendojnë se 55 ushtarë pakistanezë janë vrarë dhe disa janë marrë peng.

Sulmet me dronë:

Talebanët përdorën dronë për të sulmuar objekte ushtarake pakistaneze në Abbottabad, Swabi dhe Nowshehra.

Pakistani thotë se të gjithë dronët janë shkatërruar para se të shkaktonin dëme.

Analistët vënë në dukje se përdorimi i dronëve nga talebanët është i pazakontë dhe tregon aftësi për të goditur më thellë në territorin pakistanez.

Reagimet zyrtare

• Pakistan: Kryeministri Shehbaz Sharif deklaroi se forcat e tij kanë “shpërthyer agresionin”, ndërsa ministri i Mbrojtjes shpalli “luftë të hapur” ndaj talebanëve.
• Talebanët afganë: Kanë thënë se nuk do të fillojnë përleshje, por do të përgjigjen nëse sulmohen.
• Qari Muhammad Fasihuddin, kreu i ushtrisë talibane, paralajmëroi për një “përgjigje edhe më vendimtare” në të ardhmen.

Thirrjet ndërkombëtare

• OKB ka bërë thirrje për shmangie të menjëhershme të përshkallëzimit.
• Irani, fqinji dhe ndërmjetësi i mundshëm, ka kërkuar “qetësi” gjatë Ramazanit.
• Kina ka bërë thirrje për armëpushim dhe vetëkontroll.
• Arabia Saudite ka diskutuar me Pakistanin mënyrat për të ulur tensionet.

Arsyeja e konfliktit

• Pakistani akuzon talebanët për mbështetje të “terroristëve anti-pakistanezë” përgjegjës për sulme vetëvrasëse, përfshirë një sulm të fundit në xhami në Islamabad.
• Talebanët i kanë mohuar këto akuza dhe akuzojnë Pakistanin për sulme të paprovokuara ndaj civilëve.
• Përdorimi i sulmeve ajrore nga Pakistani ndaj objektivave qeveritare talebane tregon një përshkallëzim të jashtëzakonshëm në konflikt, i cili tejkalon përballjet e mëparshme që kishin prekur kryesisht militantët.

Analistët vënë në dukje se, ndonëse talebanët nuk kanë kapacitete për të luftuar një luftë konvencionale me Pakistanin e armatosur bërthamor, përdorimi i dronëve dhe sulmet drejt objektivave qeveritare tregon një strategji të re të aftësisë, për të goditur më thellë në territorin pakistanez.

Rritja e retorikës dhe kërcënimet e talebanëve për sulme të vazhdueshme e bëjnë situatën të brishtë dhe të rrezikshme për një konflikt të hapur. /ATSH/