Nga Ksamili te Alpet, “Skyscanner” promovon Shqipërinë si destinacionin më ekonomik për pushime
Federata e Sportit Universitar të Kosovës (FSUNK) ka shpallur “Laureatët e Vitit 2025”, në një ceremoni solemne që shënoi përmbylljen e një viti tejet të suksesshëm për sportin universitar në vend dhe në arenën ndërkombëtare.
Ngjarja mblodhi personalitete të rëndësishme nga sporti, arsimi i lartë dhe institucionet shtetërore, duke reflektuar rolin gjithnjë në rritje të sportit universitar në zhvillimin e të rinjve dhe promovimin e Kosovës në garat ndërkombëtare.
Në këtë mbrëmje festive, Laura Fazliu u shpall “Sportistja e Vitit 2025”, si vlerësim për paraqitjet dhe sukseset e saj të jashtëzakonshme në garat universitare ndërkombëtare, veçanërisht në kuadër të FISU World University Games Rhine–Ruhr 2025, ku ajo përfaqësoi me dinjitet Kosovën.
Ndërkohë, çmimi “Trajneri i Vitit 2025” iu nda Fatos Tabakut, për kontributin profesional, përkushtimin dhe punën e palodhshme në përgatitjen e sportistëve universitarë, duke ndikuar drejtpërdrejt në arritjen e rezultateve të rëndësishme për vendin.
Në ceremoni morën pjesë edhe drejtuesit e Komitetit Olimpik të Kosovës, me në krye presidentin Ismet Krasniqi, i cili në fjalën e tij përgëzoi FSUNK-në për organizimin, vizionin dhe angazhimin e vazhdueshëm në ngritjen e nivelit të sportit universitar.
Ai theksoi se sporti universitar përbën një hallkë të rëndësishme në sistemin sportiv të Kosovës, duke krijuar ura lidhëse mes arsimit dhe sportit elitar, si dhe duke kontribuar në zhvillimin e gjeneratave të reja të sportistëve.
Gjatë ceremonisë u ndanë edhe mirënjohje e çmime për sportistë të tjerë, trajnerë, gjyqtarë dhe bashkëpunëtorë që, me punën dhe përkushtimin e tyre, kanë ndikuar në mbarëvajtjen dhe avancimin e garave universitare gjatë vitit 2025.
FSUNK vlerësoi gjithashtu mbështetjen institucionale dhe partneritetin me organizata vendore e ndërkombëtare, duke theksuar se këto bashkëpunime kanë qenë kyçe në rritjen e pjesëmarrjes, cilësisë së garave dhe prezantimit dinjitoz të Kosovës në kampionate universitare evropiane dhe botërore.
Në përmbyllje, drejtuesit e federatës ritheksuan përkushtimin për vazhdimin e projekteve zhvillimore edhe në vitet në vijim, me synimin që sporti universitar të mbetet një platformë e fuqishme për talentet e reja dhe një ambasador i denjë i Kosovës në skenën ndërkombëtare sportive./KultPlus.com
