Kush janë anëtarët e “Bordit të Paqes” të Trumpit për Gazën?

Janë bërë publike emrat e personave që do të jenë pjesë e Komitetit Kombëtar për menaxhimin e Gazës, i formuar me propozim të presidentit të SHBA-së, Donald Trump.

Ekipi do të udhëhiqet nga Ali Shaath, ndërsa anëtarë të tij janë: Abdul Karim Ashour, Jaber Al-Daour, Bashir Al-Rais, Ali Barhoum, Aed Yaghi, Osama Al-Saadawi, Sami Nasman, Mohammad Bseiso, Arabi Abu Shaaban, Hana Tarzi, Rami Halas, Omar Shamali, Ayed Abu Ramadan dhe Husni Al-Mughni.

Secili prej tyre do të jetë përgjegjës për një sektor të veçantë, që përfshin fusha nga financat deri te arsimi, raporton reuters.

Përveç këtij ekipi, Trump ka emëruar edhe trupa këshillimore që do të veprojnë në bashkëpunim me Komitetin Kombëtar për menaxhimin e Gazës, ku do të përfshihen emra të njohur të politikës ndërkombëtare.

Ndër ta janë ministri i Jashtëm i Turqisë, Hakan Fidan, Sekretari amerikan i Shtetit, Marco Rubio, ish-kryeministri i Britanisë së Madhe, Tony Blair, si dhe të dërguarit e Trump-it, Steve Witkoff dhe Jared Kushner.

Bordi do të përfshijë gjithashtu drejtuesin e fondeve private dhe miliarderin Marc Rowan, presidentin e Bankës Botërore Ajay Banga, si dhe Robert Gabriel, këshilltar i Trump-it, bëri të ditur Shtëpia e Bardhë, duke shtuar se Nickolay Mladenov, ish-i dërguar i OKB-së për Lindjen e Mesme, do të jetë përfaqësuesi i lartë për Gazën.

Gjeneralmajori i ushtrisë Jasper Jeffers, komandant i operacioneve speciale të SHBA-së, është emëruar komandant i Forcës Ndërkombëtare të Stabilizimit, njoftoi Shtëpia e Bardhë. Një rezolutë e Këshillit të Sigurimit të OKB-së, e miratuar në mes të nëntorit, autorizoi bordin dhe vendet që bashkëpunojnë me të të krijojnë këtë forcë në Gaza.

Sir Tony Blair

Ish-kryeministri i Mbretërisë së Bashkuar, Sir Tony Blair, ishte përmendur prej kohësh si një anëtar i mundshëm i “Bordit të Paqes” të Trump, me presidentin amerikan që konfirmoi në shtator se Blair kishte shprehur interes për t’iu bashkuar këtij organi.

Ish-udhëheqësi i Partisë Laburiste ishte kryeministër i Mbretërisë së Bashkuar nga viti 1997 deri në 2007 dhe e futi vendin në Luftën e Irakut në vitin 2003 – një vendim që e bën praninë e tij në bord të shihet si e diskutueshme nga disa.

Pas largimit nga detyra, ai shërbeu si i dërguar për Lindjen e Mesme për Kuartetin e fuqive ndërkombëtare – Kombet e Bashkuara, Bashkimin Evropian, SHBA-në dhe Rusinë – nga viti 2007 deri në 2015.

Sir Tony është i vetmi anëtar themelues i bordit ekzekutiv që nuk është shtetas amerikan.

Ai i ka përshkruar më parë planet e Trump për Gazën si “shansi më i mirë për t’i dhënë fund dy viteve luftë, mjerimi dhe vuajtjesh”.

Marco Rubio

Si Sekretar i Shtetit i SHBA-së, Marco Rubio është qendror në qasjen e administratës Trump ndaj politikës së jashtme.

Para rikthimit të Trump në detyrë, Rubio kishte folur kundër një armëpushimi në Gaza, duke thënë se donte që Izraeli “të shkatërronte çdo element të Hamasit që mund të kapte”.

Megjithatë, më pas ai ka lavdëruar fazën e parë të marrëveshjes së armëpushimit Izrael–Hamas, të nënshkruar në tetor, duke e quajtur atë planin “më të mirë” dhe “të vetmin”.

Gjithashtu në tetor, Rubio kritikoi një lëvizje të parlamentit izraelit drejt aneksimit të Bregut Perëndimor të pushtuar.

Steve Witkoff

I dërguari special i SHBA-së për Lindjen e Mesme, Steve Witkoff – një magnat i pasurive të paluajtshme dhe partner golfi i Trump – do të jetë gjithashtu në bord.

Më herët këtë muaj, Witkoff njoftoi fillimin e fazës së dytë të planit të Trump për t’i dhënë fund luftës në Gaza, duke shtuar se ajo do të përfshinte rindërtimin dhe çmilitarizimin e plotë të Gazës, përfshirë çarmatimin e Hamasit.

Ai shtoi se pret që Hamasi “të përmbushë plotësisht detyrimet e tij” sipas marrëveshjes, ose të përballet me “pasoja serioze”.

Witkoff ka qenë një figurë qendrore në përpjekjet e udhëhequra nga SHBA për të negociuar një marrëveshje paqeje mes Rusisë dhe Ukrainës, përfshirë një takim pesëorësh me presidentin rus Vladimir Putin në Moskë në dhjetor.

Jared Kushner

Jared Kushner, dhëndri i presidentit amerikan, ka luajtur gjithashtu një rol kyç në negociatat e politikës së jashtme të administratës Trump.

Së bashku me Witkoff, Kushner ka punuar shpesh si ndërmjetës amerikan për luftërat Rusi–Ukrainë dhe Izrael–Gaza.

Në nëntor, ai u takua me kryeministrin izraelit Benjamin Netanyahu për të diskutuar pikat kyçe të bllokimit në marrëveshjen e paqes.

Në një ligjëratë në Universitetin e Harvardit në vitin 2024, Kushner tha se “prona buzë detit e Gazës mund të jetë shumë e vlefshme… nëse njerëzit do të përqendroheshin në ndërtimin e jetesës”.

Marc Rowan

Milioneri Marc Rowan është drejtori ekzekutiv i Apollo Global Management, një firmë e madhe private equity me seli në Nju Jork.

Rowan ishte parë si një kandidat i mundshëm për t’u bërë sekretar i thesarit të SHBA-së për mandatin e dytë të Trump.

Ajay Banga

Ajay Banga, president i Bankës Botërore, ka këshilluar një numër politikanësh të lartë amerikanë, përfshirë ish-presidentin Barack Obama, gjatë karrierës së tij të gjatë.

I lindur në Indi në vitin 1959, Banga u bë shtetas amerikan në vitin 2007 dhe më pas shërbeu si drejtor ekzekutiv i Mastercard për më shumë se një dekadë.

Ish-presidenti amerikan Joe Biden e emëroi atë në krye të Bankës Botërore në vitin 2023.

Robert Gabriel

Robert Gabriel, këshilltar i sigurisë kombëtare të SHBA-së, do të jetë anëtari i fundit i “bordit ekzekutiv themelues”.

Gabriel ka punuar me Trump që nga fushata presidenciale e vitit 2016 dhe, menjëherë pas kësaj, sipas PBS, u bë asistent special i Stephen Miller, një tjetër këshilltar kyç aktual i Trump.

Nickolay Mladenov

Shtëpia e Bardhë deklaroi gjithashtu se Nickolay Mladenov, politikan bullgar dhe ish-i dërguar i OKB-së për Lindjen e Mesme, do të jetë përfaqësuesi i bordit në terren në Gaza.

Ai do të mbikëqyrë një komitet të veçantë 15-anëtarësh palestinez teknokratësh, Komitetin Kombëtar për Administrimin e Gazës (NCAG), i ngarkuar me menaxhimin e qeverisjes së përditshme të Gazës pas luftës.

NCAG do të drejtohet nga Ali Shaath, ish-zëvendësministër në Autoritetin Palestinez (AP), i cili qeveris pjesë të Bregut Perëndimor të pushtuar që nuk janë nën kontroll izraelit.

Me emërimin e këtyre strukturave ka nisur zyrtarisht zbatimi i fazës së dytë të armëpushimit në Gaza, gjatë së cilës synohet vendosja e një administrate në këtë territor palestinez pa përfshirjen e Hamasit.

Faza e parë e armëpushimit zgjati tre muaj, gjatë së cilës Izraeli e shkeli marrëveshjen disa herë dhe si pasojë u vranë qindra civilë palestinezë.

Ndryshe, sulmet izraelite në Gaza që nga tetori i vitit 2023 ka shkaktuar vdekjen e dhjetëra mijëra njerëzve, ka krijuar një krizë urie dhe ka zhvendosur brenda territorit të gjithë popullsinë e Gazës. Shumë ekspertë të të drejtave të njeriut, studiues dhe një hetim i OKB-së vlerësojnë se kjo përbën gjenocid.

Izraeli ka deklaruar se ka vepruar në vetëmbrojtje, pasi militantë të udhëhequr nga Hamasi vranë 1200 persona dhe morën më shumë se 250 pengje gjatë një sulmi në fund të vitit 2023. /Telegrafi/