Ish-kreu i OVL-UÇK-së, Nasim Haradinaj, ka vizituar në Hagë ish-presidentin e Kosovës, Hashim Thaçi, dhe ish-kryeparlamentarin Kadri Veseli, të cilët po mbahen në paraburgim për mbi pesë vjet.
Haradinaj tha se i kishte gjetur ata në gjendje të mirë shpirtërore dhe mendore, pavarësisht kohës së gjatë pa u takuar.
Ai shtoi se Thaçi dhe Veseli janë optimistë se në fund do të ketë drejtësi dhe një aktgjykim lirues, transmeton Klankosova.tv.
“Edhe pse ishte një kohë e gjatë që nuk i kisha parë, i pashë shumë të motivuar, shumë të relaksuar, me pikëpamje mendore shëndetësore. Ata e kanë marrë me qetësi çështjen dhe e kuptojnë se duhet t’i përgjigjen të ashtuquajturës drejtësi, por janë optimistë se në fund do të ketë drejtësi dhe një aktgjykim lirues”, u shpreh Haradinaj.
Ai shtoi se gjatë vizitës kishte bërë edhe një gjest simbolik, duke theksuar se ishte diçka “që ata të burgut të mos ta harrojnë”.
Megjithatë, Haradinaj theksoi se vizita në paraburgimin e Hagës ishte e mbikëqyrur rreptësisht, duke e cilësuar atë si shumë “kontrolluese”. /Klankosova.tv/
Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.
