Ministrja e Jashtme palestineze thotë se votimi në OKB është ‘hapi i parë drejt paqes’

Ministrja e Jashtme palestineze Varsen Aghabekian Shahin tha të martën se miratimi nga Këshilli i Sigurimit i OKB-së i një rezolute që mbështet planin e Presidentit të SHBA-ve, Donald Trump për t’i dhënë fund luftës në Gaza ishte një hap i parë i nevojshëm në një rrugë të gjatë drejt paqes.

Këshilli i Sigurimit miratoi të hënën rezolutën e hartuar nga SHBA-të, që gjithashtu autorizon një forcë shumëkombëshe sigurie që të vendoset në Gaza dhe vendos një mekanizëm ndërkombëtar mbrojtës për territorin e shkatërruar nga dy vjet luftë.

Rezoluta e OKB-së është hapi i parë në një rrugë të gjatë drejt paqes.

“Ky hap ishte i nevojshëm sepse nuk mund të ndërmerrnim asgjë tjetër përpara se të kishim një armëpushim”, u tha Shahin gazetarëve në Manila gjatë një vizite në Filipine.

Shahin tha se kishte ende çështje të tjera që duheshin adresuar, duke përfshirë vetëvendosjen palestineze dhe pavarësinë përfundimtare palestineze, dhe se procesi për zbatimin e planit të Trump duhet të rregullohet nga e drejta ndërkombëtare.

Ajo tha se, megjithëse plani i Trumpit aludon në një shtetësi të mundshme palestineze dhe vetëm pasi AP-ja të kryejë reformat, kjo çështje mund të trajtohet më vonë.

“Për sa kohë që këto elementë janë aty, ne jemi të kënaqur me këtë hap të parë”, tha Shahin.

Autoriteti Palestinez me seli në Ramallah më parë e mirëpriti votimin dhe ka thënë se është gati të marrë pjesë në planin e Trumpit, i cili nuk përcakton një rol të qartë për AP-në dhe bën referenca të paqarta për shtetësinë.

Shtetet evropiane dhe arabe kanë thënë se Gaza duhet të qeveriset nga Autoriteti Palestinez dhe se duhet të ketë një rrugë të qartë drejt pavarësisë palestineze.

Qeveria izraelite, e cila kundërshton idenë e një shteti të pavarur palestinez, hedh poshtë çdo përfshirje nga Autoriteti Palestinez.

Sipas fazës fillestare të planit të Trump, një armëpushim midis Izraelit dhe Hamasit hyri në fuqi më 10 tetor.

Të dyja palët kanë akuzuar njëra-tjetrën për shkelje të armëpushimit, por ai vazhdon të zbatohet.

Që atëherë, Hamasi ka liruar shumicën e pengjeve nga Gaza. Mbetjet e tre pengjeve të ndjera mbahen ende. /Albanianpost.com