Komisioni Qendror i Zgjedhjeve (KQZ) ka përmbyllur numërimin e votave të diasporës për zgjedhjet lokale të 12 tetorit në pjesën më të madhe të komunave, një proces që në disa vende ka qenë vendimtar për përcaktimin e raundit të dytë.
Sipas rezultateve të fundit, Mitrovica e Jugut, Gjilani, Juniku dhe Dragashi do të shkojnë në balotazh më 9 nëntor, ndërsa në Shtime dhe Hani i Elezit janë konfirmuar fituesit pa nevojën e një raundi shtesë.
Në Mitrovicën e Jugut, pas përfshirjes së votave me postë, ka ndryshuar renditja e kandidatëve: Faton Peci i Lëvizjes Vetëvendosje ka kaluar në epërsi me 55.92% të votave të diasporës, përballë Arian Tahirit të PDK-së me 33.67%, duke përmbysur diferencën minimale të rezultateve preliminare. Megjithatë, gara do të vendoset në balotazh.
Në Gjilan, ku pritej nëse Alban Hyseni i Vetëvendosjes do ta siguronte fitoren në raundin e parë, votat e diasporës konfirmuan se komuna do të shkojë në balotazh. Hyseni ka 49.84% të votave, ndërsa kandidati i LDK-së, Arbër Ismajli, 34.29%.
Edhe Juniku dhe Dragashi ndjekin të njëjtin skenar. Në Junik prin Ruzhdi Shehu (LDK) me 50.97% të votave të diasporës, i pasuar nga Agron Kuçi (AAK) me 35.34%, ndërsa në Dragash kryeson Bexhet Xheladini (LDK) me 55.92% të votave me postë, përballë Shaban Shabanit (PDK) me 25.43%.
Në Shtime, rezultati mbetet i pandryshuar: Qemajl Aliu (LVV) ka siguruar një mandat të dytë pa balotazh.
Ndërkohë, në Hanin e Elezit, ku diferenca mes kandidatëve është vetëm 93 vota, procesi i numërimit nga diaspora është ende në zhvillim, por fitorja paraprakisht i takon Mehmet Ballazhit (PDK) përballë Rufki Sumës si kandidat i pavarur.
Në total, KQZ ka pranuar 33,841 pako të supozuara me fletëvotime nga 23 kuti postare në 22 shtete, prej të cilave 29,636 janë aprovuar dhe 3,977 refuzuar, kryesisht për mungesë të dëftesës së regjistrimit.
