Debutimi i Korit të Filharmonisë së Kosovës në Hamburg dhe Düsseldorf u shoqërua me duartrokitje të gjata dhe kritika pozitive, duke dëshmuar se muzika kosovare mund të qëndrojë denjësisht në skenat më prestigjioze evropiane.
Nën dirigjimin e Hajrullah Sylës, ansambli solli një program që ndërthurte veprat e kompozitorëve kosovarë – nga Halit Kasapolli e deri te Baki Jashari – me krijime të autorëve evropianë si Brahms dhe Ešenvalds.
Ky kombinim krijoi një dialog kulturash dhe u prit me interes të veçantë nga publiku gjerman, për të cilin tingujt shqiptarë ishin një risi.
Sipas Sylës, koncerti ishte një ndër momentet më të rëndësishme në rrugëtimin e Korit, duke u vlerësuar si artistikisht i nivelit të lartë.
Këto paraqitje vijnë në prag të 25-vjetorit të Filharmonisë së Kosovës, që do të shënohet me dy koncerte në Prishtinë e Shkup, përpara një performance tjetër madhore në Vatikan në fund të vitit.
Turneu në Gjermani shënon një hap historik për institucionin, duke afirmuar identitetin kulturor të Kosovës në mozaikun muzikor evropian. /AlbanianPost/
