Raundi i fundit i bisedimeve për një armëpushim mes Izraelit dhe Hamasit, i zhvilluar në Doha nën ndërmjetësimin e Katarit dhe Egjiptit, ka përfunduar pa arritur ndonjë marrëveshje konkrete, konfirmoi një zyrtar palestinez, shkruan Gazeta Sinjali.
Takimi zgjati rreth tre orë e gjysmë dhe u mbajt në dy ndërtesa të ndara, me ndërmjetësit që përcollën mesazhet mes palëve, për shkak të refuzimit për bisedime direkte.
Sipas burimeve të Reuters, delegacioni izraelit nuk kishte mandat të plotë për të nënshkruar ndonjë marrëveshje, gjë që kufizoi mundësinë për progres real.
Nga ana tjetër, Hamasi deklaroi se kishte shprehur një “frymë pozitive” ndaj propozimit më të fundit, por mbeti i qëndrueshëm në kërkesat e tij kryesore: ndalimi i luftimeve dhe tërheqja e ushtrisë izraelite nga Gaza – kushte që Tel Avivi i ka refuzuar më parë.
