Ukraina ka marrë një vendim për të rritur ndjeshëm numrin e sulmeve me rreze të gjatë veprimi në territorin rus, me një kontratë të re për dhjetëra mijëra dronë për operacione sulmi në thellësi që tashmë është duke u përgatitur.
Kështu siç shkruajnë mediat ukrainase, ka thënë ministri i Mbrojtjes, Rustem Umerov për Kyiv Post dhe gazetarë të tjerë më 26 qershor, gjatë një takimi me dyer të mbyllura.
“Rreth dy javë më parë, u mor një vendim për të shkallëzuar këto operacione. Ne tashmë po përgatisim një kontratë të re të madhe për të rritur intensitetin e sulmeve”, citohet të ketë thënë Umerov.
Siç theksohet më tej, një plan sistematik për operacione me rreze të gjatë veprimi u formua vitin e kaluar: dhjetëra mijëra dronë sulmi në thellësi u kontraktuan, të cilët tani synojnë rregullisht objektiva kritike thellë pas vijave të armikut.
Dërgesat po vazhdojnë sipas orarit dhe misionet luftarake kryhen çdo ditë sipas një plani të miratuar, tha Umerov.
Në të njëjtën kohë, sipas Umerov, Rusia kohët e fundit ka intensifikuar përdorimin e sulmeve të kombinuara.
Gjatë sulmeve të fundit të natës, Rusia ka përdorur deri në 500 dronë Shahed njëkohësisht, duke i kombinuar ato me raketa balistike dhe raketa lundrimi.
Qëllimi është të shterohen mbrojtja ajrore ukrainase, të analizohet mbrojtja e saj e shtresuar dhe të ushtrohet presion psikologjik.
Megjithatë, siç theksojnë mediat ukrainase, forcat mbrojtëse ukrainase po gjejnë zgjidhje – si taktike ashtu edhe teknologjike.
Umerov theksoi se mjetet që funksionuan mirë në fillim të luftës në shkallë të plotë tani po humbasin efektivitetin e tyre.
Andaj, Ukraina po prezanton zgjidhje të reja, duke përfshirë dronë interceptues dhe mjete të tjera që qëllimisht nuk zbulohen për arsye sigurie.
I gjithë sistemi i kundërmasave të dronëve, sipas ministrit, është një cikël i vazhdueshëm inovacioni, testimi dhe përmirësimi.
Ukraina gjithashtu po vazhdon punën sistematike mbi kundërmasat efektive kundër dronëve kamikaze, tha Umerov, duke treguar se gjatë tre viteve të fundit ka pasur punë të vazhdueshme për të zhvilluar një model efektiv mbrojtës kundër Shahedëve.
Sipas Umerov, deri në fund të vitit, Forcat e Armatosura të Ukrainës do të kenë marrë mbi katër milionë dronë, nga të cilët rreth 1.5 milion janë dorëzuar tashmë në front. /Telegrafi/
