Një raund i ri bisedimesh që synojnë zgjidhjen e një lufte tregtare midis SHBA-së dhe Kinës është planifikuar të zhvillohet të hënën në Londër.
Presidenti i SHBA-së, Donald Trump njoftoi të premten se një delegacion i lartë amerikan do të takohet me përfaqësues kinezë, shkruajnë mediat e huaja, përcjell Telegrafi.
Gjatë fundjavës, Pekini konfirmoi se zëvendëskryeministri He Lifeng do të marrë pjesë në bisedime.
Njoftimet erdhën pasi Trump dhe udhëheqësi i Kinës, Xi Jinping patën një bisedë telefonike javën e kaluar, të cilën presidenti i SHBA-së e përshkroi si një “bisedë shumë të mirë”.
Muajin e kaluar, dy ekonomitë më të mëdha në botë ranë dakord për një “armëpushim të përkohshëm” për të ulur taksat e importit për mallrat që tregtohen midis tyre, por që atëherë të dy vendet kanë akuzuar njëra-tjetrën për shkelje të marrëveshjes.
Sipas agjencisë shtetërore kineze të lajmeve Xinhua, Xi i tha Trump se SHBA-të duhet të “tërheqin masat negative që kanë marrë kundër Kinës”.
Telefonata ishte hera e parë që të dy udhëheqësit kishin folur që nga shpërthimi i luftës tregtare në shkurt.
Kur Trump njoftoi tarifa gjithëpërfshirëse për importet nga një numër vendesh në fillim të këtij viti, Kina ishte më e goditura.
Pekini u përgjigj me normat e veta më të larta për importet amerikane, dhe kjo shkaktoi rritje të taksave që arritën kulmin në 145%.
Në maj, bisedimet e mbajtura në Zvicër çuan në një “armëpushim të përkohshëm” që Trump e quajti një “rivendosje totale”.
Ai i uli tarifat amerikane për produktet kineze në 30%, ndërsa Pekini uli taksat mbi importet amerikane në 10% dhe premtoi të hiqte barrierat për eksportet kritike të mineraleve. /Telegrafi/
