Si prodhohet djathi, një ndër specialitetet e Qumështores Gexha
Tani, shtetasit e Katarit kanë të drejtë të udhëtojnë në vendet e zonës Shengen të Bashkimit Evropian pa u kërkuar që fillimisht të aplikojnë për vizë.
Vendimi është konfirmuar nga Parlamenti Evropian, sipas “Schengen Visa Info”.
Komiteti i Parlamentit Evropian për Liritë Civile, Drejtësinë dhe Çështjet e Brendshme ka votuar në favor të Katarit.
Vetëm 16 deputetë të Parlamentit Evropian kanë votuar kundër.
Sakaq, ky vendim i ri është marrë në mes të Kupës së Botës 2022.
Majed bin Mohammed Al Ansari, këshilltar i ministrit të Punëve të Jashtme, ka theksuar se Ministria e Punëve të Jashtme e ka përshëndetur këtë vendim të Komisionit.
Një vendim ky, sipas tij, që përjashton të gjithë qytetarët e Katarit nga kërkesat për viza kur udhëtojnë në vendet e zonës Shengen.
Ai ka folur edhe për hapat e ardhshëm, të cilët përfshijnë edhe fillimin e diskutimeve në një komision që përfaqëson Komisionin Evropian, Bashkimin Evropian, si dhe Parlamentin Evropian.
E gjitha për të krijuar një plan konkret për marrëveshjen e përjashtimit të vizave mes Katarit dhe BE-së.
Kurse Abdulaziz bin Ahmed Al Malki, Ambasador i Shtetit të Katarit në BE dhe NATO, e ka konsideruar vendimin një hap themelor.
Po ashtu ka ravijëzuar se votimi vjen si pjesë e përpjekjeve të Ministrisë së Punëve të Jashtme të Katarit për t’u kujdesur për interesat e qytetarëve dhe për të përshpejtuar udhëtimet e tyre në të gjitha vendet e botës.
Komisioni Evropian, në prill të vitit 2022, propozoi heqjen e vizave për Katarin, duke theksuar se ka plotësuar të gjitha kushtet e nevojshme për të përfunduar këtë proces. /Albanianpost.com
