Jose Mourinho ka komentuar fitoren dramatike të Real Madridit ndaj Romës me rezultat 4-3, në një ndeshje të Ligës së Kampionëve ku skuadra italiane ishte në epërsi prej dy golash, por në fund pësoi përmbysje.
Trajneri portugez, i cili u rikthye në stadiumin “Olimpico” për herë të parë si kundërshtar i Romës, vlerësoi paraqitjen e skuadrës së tij në minutat e fundit, duke theksuar se madrilenët ishin të pandalshëm në atë periudhë.
“Ju mund të thoni se ishin dy ndeshje në një. Roma ishte superiore në çdo aspekt në pjesën e parë, ndërsa Real Madridi ishte i pamundur për t’u ndalur gjatë atyre 20 minutave”, deklaroi Mourinho për “Amazon Prime Video Italia”.
Portugezi pranoi se Roma i kishte befasuar në fillim të ndeshjes, por kritikoi golin e pësuar nga skuadra e tij, duke e cilësuar atë si të papranueshëm në këtë nivel të futbollit.
“Na befasuan në fillim duke e përdorur Matias Soulén në krah, duke krijuar epërsi në atë zonë. Pësuam një gol qesharak, të cilin nuk mund ta lejosh në këtë nivel”, tha ai.
Mourinho veçoi reagimin e Real Madridit pasi Roma kaloi në epërsi 3-1, duke thënë se skuadra e tij nuk ishte dorëzuar, ndonëse kundërshtarët mund të kishin menduar se ndeshja ishte vendosur.
“Pasi shkuam në disavantazh 3-1, ndoshta të gjithë menduan se ndeshja kishte përfunduar, por të vetmit që kishin vdekur ishin lojtarët e Romës. Është shumë e vështirë të luash me këtë intensitet dhe me këtë stil futbolli”, u shpreh trajneri portugez.
Ai shtoi se ndryshimet e bëra gjatë ndeshjes i dhanë një tjetër ritëm skuadrës madrilene, e cila arriti ta përmbyste rezultatin me një seri sulmesh të fuqishme.
“Ne bëmë disa ndryshime, sepse të pësosh tre, katër apo pesë gola nuk bën ndonjë dallim të madh. Roma nuk ishte në gjendje ta përballonte ortekun e futbollit sulmues që lëshuam”, përfundoi Mourinho.
Një nga ndryshimet vendimtare ishte inkuadrimi i Endrickut, për të cilin Mourinho tha se Roma e kishte kërkuar gjatë verës dhe mund të tentojë sërish ta huazojë në janar.
“Është e pamundur, sepse unë e njoh talentin e tij dhe atë që mund të japë”, tha Mourinho, duke iu referuar mundësisë që sulmuesi brazilian të transferohej te Roma.
Në fund, trajneri i Real Madridit sqaroi edhe gjestin e bërë drejt tribunave pas përfundimit të ndeshjes, duke theksuar se ishte thjesht festim për fitoren.
“Asgjë, fituam dhe po festoja. Kam respektin më të madh për Romën”, përfundoi ai. /KosovaPress/
