Pas tre vitesh, periudhës së dytë të Zlatan Ibrahimovic në Milan thuhet se po i afrohet fundi dhe ai do të largohet nga klubi në verë.
Sulmuesi 41-vjeçar suedez është paraqitur shumë pak për kuqezinjtë këtë sezon, duke bërë vetëm katër paraqitje në Serie A muajin e kaluar pasi u rikuperua nga një operacion i rëndë në gju. Fatkeqësisht, një dëmtim muskulor e ka detyruar sërish të largohet.
Ibrahimovic filloi periudhën e tij të dytë me Milanin në janar 2020 dhe ka qenë një figurë e rëndësishme në dhomën e zhveshjes, duke ndihmuar në sigurimin e Scudetto-s së parë të klubit në më shumë se një dekadë sezonin e kaluar.
Siç raportohet nga Foot Mercato, Milani nuk po planifikon t’i ofrojë Ibrahimovic një kontratë të re, kështu që ai do të largohet nga klubi kur marrëveshja e tij të përfundojë në fund të qershorit.
/GazetaBlicSport/
