Zelensky: Ukraina mbështet idenë që Turqia të presë takim trepalësh për negociatat e paqes

Presidenti ukrainas, Volodymyr Zelensky, deklaroi se Kievi është i gatshëm të mbështesë zhvillimin e një takimi trepalësh të liderëve në Turqi, në kuadër të përpjekjeve për arritjen e paqes.

Pas takimit me presidentin turk Recep Tayyip Erdogan në New York, Zelensky tha se marrëdhëniet mes Ukrainës dhe Turqisë janë shumë të forta dhe se biseda me homologun turk ishte produktive.

Sipas Zelenskyt, Erdogan ka shprehur gatishmërinë që Turqia të presë një takim trepalësh në nivel liderësh.

Presidenti ukrainas tha se Kievi e mbështet këtë propozim dhe është i gatshëm të marrë pjesë në një samit të tillë në Turqi.

“Ne do ta mbështesim idenë që takimi të mbahet në Turqi dhe do të jemi të gatshëm të marrim pjesë”, deklaroi Zelensky.

Gjatë takimit, dy liderët diskutuan gjithashtu marrëdhëniet ekonomike dhe tregtare mes dy vendeve. Zelenskyy tha se Ukraina dhe Turqia synojnë të rrisin ndjeshëm vëllimin e tregtisë dypalëshe, nga rreth 1 miliard dollarë në 10 miliardë dollarë.

Në fokus të bisedimeve ishin edhe çështjet e sigurisë në Detin e Zi, mundësia e një armëpushimi ose pauze në luftime në zonat detare, si dhe siguria ushqimore.

“Turqia është një partner shumë i fortë për Ukrainën në Detin e Zi”, tha Zelensky. /tvklan.al