Zbulohen detaje të reja të largimit të Neymar nga Barcelona në vitin 2017

Neymar u detyrua të “qajë më shumë se një herë” nga ish-drejtori i futbollit të Barcelonës, Raul Sanllehi, përpara se të largohej nga klubi për në Paris Saint-Germain, tregojnë dokumentet e zbuluara nga gazeta spanjolle El Mundo.

Superylli brazilian iu bashkua klubit francez në verën e vitit 2017 për një tarifë rekord botëror transferimi prej 222 milionë euro– një shumë që ende nuk është tejkaluar në pesë vitet që nga ajo kohë. Ishte një lëvizje mahnitëse që ndihmoi në ndryshimin e peizazhit të futbollit evropian.

Barcelona ishte e pafuqishme të parandalonte yllin e tyre që të largohej nga klubi pasi PSG pagoi klauzolën e tij të lirimit në Camp Nou. Ishte një shfaqje e forcës nga klubi francez, të cilët treguan muskujt e tyre financiarë dhe nënvizoi ambiciet e tyre për t’u bërë skuadra më e mirë në futbollin botëror.

Raul Sanllehi, Drejtori i Futbollit të Barcelonës në atë kohë, ishte zëri i klubit katalanas në procesin e negociatave me Neymar dhe babain e tij, i cili gjithashtu vepronte si agjent i tij. Barcelona ishte e dëshpëruar dhe donte që lojtari të qëndronte, por kampi i tij po zemërohej me klubin.

Detajet e bisedave me email janë zbuluar nga El Mundo, e cila përshkruan se si Sanllehi i tregoi klubit se babai i Neymar ishte i zemëruar me Barcelonën për zbulimin e bonusit të nënshkrimit të Neymar, i cili arriti në 64.4 milionë euro, kjo klauzolë ishte bërë shkaku i sherrit mes dy palëve.

Sanllehi – i cili më vonë mori një rol të ngjashëm në Arsenal – i komunikoi klubit në atë që duket të jetë një përpjekje për të qetësuar marrëdhëniet: “Kam qenë me këtë njeri për orë e orë të tëra dhe mendoj se e njoh mjaft mirë për të ditur kur ai po bën bllof dhe kur thotë të vërtetën, në këtë rast jam absolutisht i bindur, më ka treguar se është në anën tonë”.

Sanllehi vazhdoi të komunikonte se si ai besonte se Neymar kishte “shumë probleme personale” në atë kohë dhe se ai e kishte paralajmëruar atë se opsioni i tij më i mirë ishte të qëndronte në klub, në vend që të “ikte” nga çështja, ndërsa pretendonte se e kishte e bërë brazilianin të qajë më shumë se një herë.

Korrespondenca me email vazhdoi: “Ju kam thënë të gjithëve veçmas se problemi, në këtë rast, ishte koka e lojtarit. Djali është në gjendje të keqe, ka shumë probleme personale, është shumë konfuz dhe shumë i cenueshëm. Kështu që ai gabimisht ka menduar se duke ikur nga Barcelona do të ikë edhe nga problemet e tij (kur në të vërtetë ajo që duhet të bëjë është të përballet me to dhe të mos largohet). Kam folur drejtpërdrejt me të, vazhdimisht. E kam bërë të qajë më shumë se një herë dhe ai më ka pranuar në më shumë se një rast se ka humbur”.

Babai i Neymar sulmoi klubin për bonus-in, duke shkruar: “Unë nuk ju besoj, ju më keni mashtruar vazhdimisht”. Më pas ai kërkoi që tarifa të paguhej menjëherë, gjë që nuk u bë, dhe Neymar më pas iu bashkua PSG-së atë verë. /Albanianpost.com