Aksidentohet një kamion me një veturë në Gjakovë, lëndohet një person
Raportuesja për Kosovën në Parlamentin Evropian (PE), Viola von Cramon, nëpërmjet një postimi në platformën “X” të mërkurën, adresoi një thirrje për Qeverinë e Serbisë që ta ndalë menjëherë diskriminimin sistematik dhe pasivizimin e adresave të shqiptarëve në Luginën e Preshevës.
Derisa njoftoi për takimin që zhvilloi gjatë ditës me përfaqësuesit politikë të shqiptarëve të Preshevës, Medvegjës e Bujanocit, eurodeputetja gjermane u kërkoi autoriteteve shtetërore serbe që ta ndalin urgjentisht diskriminimin sistematik ndaj shqiptarëve që janë shumicë në jug të Serbisë.
“Një takim i rëndësishëm me përfaqësuesit politikë të minoritetit shqiptar nga jugu i Serbisë. Diskriminimi sistematik ndaj tyre, përfshirë ‘pasivizimin’ e adresave nga Serbia është e papranueshme dhe duhet ndalur menjëherë!”.
Politika diskriminuese e Serbisë qëndron në faktin se në momentin kur shqiptarëve u pasiviziohet adresa e vendbanimit dhe fshihet nga regjistri civil i shtetit, ai/ajo nuk mund të marrë letërnjoftim të ri ose pasaportë.
E qytetari shqiptar nuk gëzon të drejtën e shërbimeve mjekësore ose asistencës sociale, nuk mund të regjistrojë makinën, nuk mund të blejë apo shesë pronën dhe nuk mund të votojë në zgjedhjet lokale apo qendrore.
Ndryshe, përfaqësuesit e shqiptarëve dhe boshnjakëve në Serbi kanë kërkuar vazhdimisht reciprocitet të të drejtave me serbët që jetojnë në Kosovë, pas pakënaqësive me statusin e tyre në përgjithësi, posaçërisht në Novi Pazar, Tutin e Sjenicë në Sanxhak dhe në Preshevë, Medvegjë e Bujanoc. /Albanianpost.com