Portieri gjerman, Marc-Andre ter Stegen, do të vijojë të jetë kapiteni i parë i Barcelonës, pas një ndalese të shkurtër lidhur me një çështje disiplinore.
Të enjten, klubi katalunas njoftoi se kishte nisur procedurë disiplinore ndaj Ter Stegenit, pasi portieri i përfaqësueses së Gjermanisë kishte refuzuar të nënshkruante dokumentin mjekësor që Barça duhej t’ia dorëzonte La Ligës në lidhje me operacionin që kishte kryer.
Si pasojë, Ter Stegeni iu hoq shiriti i kapitenit.
Megjithatë, të premten klubi njoftoi se situata është zgjidhur.
“Klubi njofton se Marc-Andre ter Stegen ka nënshkruar autorizimin e nevojshëm që klubi t’i dërgojë La Ligës raportin mjekësor në lidhje me operacionin e tij. Çështja disiplinore është mbyllur dhe lojtari është përsëri kapiten i ekipit të parë me efekt të menjëhershëm”, thuhet në komunikatën zyrtare të Barcelonës. /GazetaSinjali/
