GTA 6 pritet të sjellë fitime rekord, parashikohen miliona porosi paraprake
Administrata amerikane nuk e konsideron të nevojshme që sekretari amerikan i Shtetit, Marco Rubio të marrë pjesë në një takim të planifikuar prej kohësh të ministrave të Jashtëm të NATO-s në Bruksel, pavarësisht bisedimeve të vazhdueshme mbi një zgjidhje të mundshme paqësore për luftën në Ukrainë.
“Sekretari amerikan i Shtetit, Marco Rubio ka marrë pjesë tashmë në dhjetëra takime me aleatët e NATO-s dhe do të ishte plotësisht jopraktike ta prisnim atë në çdo takim”, tha sot një zëdhënës i Departamentit Amerikan të Shtetit (DASH).
Zëvendës-sekretari i Shtetit Christopher Landau do të marrë pjesë në bisedimet nesër, të cilat do të përqendrohen në mbështetjen e vazhdueshme për Ukrainën.
Rubio u raportua se ndodhej në Uashington për angazhime të tjera në Shtëpinë e Bardhë.
Një sekretar shteti amerikan që mungon në takimet zyrtare të NATO-s është shumë e pazakontë.
“Nuk mbaj mend diçka të tillë në historinë e kohëve të fundit”, tha ish-zëdhënësja e NATO-s Oana Lungescu në X.
Ajo vuri në dukje se mungesa e tij po dërgonte sinjalin e gabuar, veçanërisht në një kohë kur nevojitej një koordinim më i ngushtë me aleatët evropianë për Ukrainën.
Një arsye e mundshme pas vendimit të SHBA-së duket të jetë se disa anëtarë të administratës e shohin NATO-n si një pengesë për zbatimin me sukses të iniciativës së fundit të presidentit amerikan, Donald Trump – që synon t’i japë fund luftës së Rusisë në Ukrainë.
Drafti i fundit i planit të paqes me 28 pika përfshin një seksion që i bënte thirrje NATO-s të hiqte dorë plotësisht nga pranimi i anëtarëve të rinj.
Sipas draftit, SHBA-ja e sheh veten më pak si anëtare të NATO-s dhe më shumë si një ndërmjetëse e jashtme, duke propozuar një dialog të ndërmjetësuar nga SHBA-ja midis Rusisë dhe NATO-s.
Anëtarët kryesorë evropianë të NATO-s, përfshirë Gjermaninë, Francën dhe Italinë, i kritikuan këto propozime. Në përgjigje, zyrtarët amerikanë thanë se çështjet e NATO-s do të trajtoheshin më vete. /ATSH-DPA/
