OpenAI drejt bursës? Kompania përgatit dokumentet konfidenciale

OpenAI po përgatit dokumentet konfidenciale për një ofertë publike fillestare (IPO), sipas Axios dhe burimeve pranë procesit, duke sinjalizuar se kompania që qëndron pas ChatGPT mund të jetë shumë pranë hyrjes në Wall Street.

Sipas raportimit, prospekti konfidencial mund të depozitohet shumë shpejt, megjithëse afatet mbeten ende të lakueshme.

Lëvizja shihet edhe si një kundërpërgjigje strategjike ndaj SpaceX, e cila po përgatitet gjithashtu për IPO-në e saj të shumëpritur.

Në sfond po zhvillohet një përplasje gjithnjë e më e fortë mes dy kampeve më të fuqishme të inteligjencës artificiale: nga njëra anë OpenAI dhe aleatët e saj financiarë, dhe nga ana tjetër Elon Musk me ekosistemin e tij teknologjik.

Ironikisht, të dy kompanitë po punojnë me pothuajse të njëjtat banka investimi, përfshirë Goldman Sachs, Morgan Stanley dhe JPMorgan Chase.

Sipas Axios, prej kohësh në Silicon Valley qarkullon ideja se si OpenAI ashtu edhe Anthropic synojnë të dalin në bursë brenda këtij viti, me një dritare të mundshme mes festës së Ditës së Punës dhe Falënderimeve në SHBA.

Procedura e IPO-ve konfidenciale zakonisht nis disa muaj përpara publikimit të dokumentit zyrtar S-1 dhe rreth një muaj para ofertës reale në treg.

SpaceX kishte depozituar në mënyrë konfidenciale dokumentet më 1 prill dhe investitorët presin tashmë publikimin e S-1, që mund të hapë rrugën për një debutim në bursë në fund të qershorit.

Ndërkohë, OpenAI sapo ka kaluar një tjetër betejë të rëndësishme ligjore kundër Elon Musk. Themeluesi i Tesla dhe SpaceX kishte sfiduar në gjykatë strukturën dhe drejtimin e kompanisë, por OpenAI arriti të zmbrapsë padinë, edhe pse Musk ka paralajmëruar apelim.

Nëse IPO-ja materializohet, OpenAI mund të shndërrohet në një nga listimet më të mëdha teknologjike të dekadës dhe një moment historik për industrinë globale të Inteligjencës Artificiale. /Albanianpost.com