Komisioni hetimor për krizën energjetike pritet të intervistojë edhe krerët e partive politike

Komisioni hetimor për menaxhimin e krizës energjetike pritet të intervistojë përgjegjësit kryesorë në sektorin energjetik në Kosovë. Përveç këtyre, në mbledhjen e sotme u diskutua që si dëshmitar të ftohet edhe ambasadori i Kosovës në Kroaci, Martin Berishaj, ndërkohë u dha si propozim nga deputetët e LVV-së që në listën e dëshmitarëve të përfshihen edhe kryetarët e partive opozitare.

Megjithatë, miratimi i planit të veprimit u vendos që të bëhet në mbledhjen e radhës. Propozimet fillestare për intervistimin e dëshmitarëve i dha kryetari i komisionit, Driton Selmanaj.

Selmanaj: Kjo është lista e dëshmitarëve për t’i intervistuar

“Lista e dëshmitarëve për intervistim i kam cekur vetëm institucionet, jo emrat e përveçëm. Fillimisht është Qeveria, në kuadër të saj është Ministria e Ekonomisë, Ministria e Financave, ZRrE-ja, KOSTT, KEK, KEDS dhe KESCO. Pastaj është Ndërmarrja Kosova Thëngjill, ambasadori i Kosovës në Kroaci Martin Berishaj, Avokati i Popullit Naim Qelaj dhe Agjencia Anti-Korrupsion”, tha ai.

Kërkesë shtesë për intervistim parashtroi anëtari i komisionit nga radhët e PDK-së, Ferat Shala.

Shala: Të ftohen edhe task-forcat e krijuara për menaxhim të krizës energjetike

“Të shtohet lista edhe me ekipin e task-forcës dhe të gjitha grupeve të tjera operacionale-teknike apo organizative që kanë vepruar gjatë periudhës së menaxhimit të krizës energjetike”, shtoi Shala.

Nga ana tjetër, anëtari i komisionit nga radhët e LVV-së, Artan Abrashi, tha se në listën e të intervistuarve të përfshihen edhe krerët e partive politike, për pretendimet e tyre në kohën kur është miratuar gjendje emergjente për menaxhimin e krizës energjetike.

Abrashi: Duhet të intervistohen edhe kryetarët e partive politike

“Në kuadër të listës së personave që duhet të intervistohen duhet të jenë edhe kryetarët e partive politike. Pasi në kohën kur është miratuar gjendja emergjente për menaxhim të krizës kanë bërë pretendime të cilët kapin elemente që mund të jenë interes i këtij komisioni për t’i hetuar”, tha ai.

Këtë kërkesë e përkrahu edhe kryetari i komisionit, Driton Selmanaj.

Selmanaj: Pa asnjë telashe i ftojmë kryetarët e partive

“Do të provojmë të fokusohemi profesionalisht sa mundemi. Nëse vlerësojmë se dikush nga politikanët në Kosovë mund të na ndihmojë në aspektin profesional të zbardhjes së vërtetës, pa asnjë telashe i ftojmë”, shtoi ai.

Pas këtyre diskutimeve, komisioni vazhdoi mbledhjen pa praninë e mediave, ku u diskutua për angazhimin e ekspertëve dhe miratimin e buxhetit të komisionit./KosovaPress/