Francis Bacon, një nga figurat më të rëndësishme të artit modern të shekullit XX, u lind më 28 tetor 1909. Më shumë se tri dekada pas vdekjes së tij, veprat e piktorit britanik me origjinë irlandeze vazhdojnë të provokojnë, të tronditin dhe të nxisin reflektim mbi natyrën njerëzore.
I njohur për portretet dhe figurat e deformuara, ngjyrat e forta dhe kompozimet shpesh shqetësuese, Bacon e vendosi në qendër të krijimtarisë së tij trupin njerëzor, duke eksploruar frikën, dhimbjen, vetminë dhe brishtësinë e ekzistencës.
I lindur në Dublin të Irlandës, nga prindër anglezë, Bacon u vendos në Londër në rini dhe nisi të merrej me dizajnin e mobilieve dhe interierëve, përpara se t’i përkushtohej plotësisht pikturës. Pa një formim akademik në art, ai zhvilloi një gjuhë artistike të veçantë, që e bëri një prej emrave më të spikatur të pikturës figurative të pasluftës.
Një pikë kthese në karrierën e tij ishte vepra Three Studies for Figures at the Base of a Crucifixion (1944), e cila tërhoqi vëmendjen e publikut dhe kritikës për figurat e saj tronditëse dhe forcën shprehëse. Më pas, portretet, autoportretet dhe triptikët e tij u bënë pjesë e rëndësishme e historisë së artit bashkëkohor.
Bacon ndërroi jetë më 28 prill 1992, në Madrid, në moshën 82-vjeçare. Sot, veprat e tij ruhen në koleksione të rëndësishme muzeale dhe vazhdojnë të ndikojnë artistë e të tërheqin vëmendjen e publikut ndërkombëtar.
Foto: Francis Bacon në studion e tij në Londër, fotografuar nga Michael Holtz, në vitin 1974. /atsh
