Presidenti amerikan, Donald Trump sinjalizoi se ishte në prag të arritjes së një marrëveshjeje paqeje me Iranin, por nuk e miratoi marrëveshjen pas një takimi dyorësh të premten.
Shtetet e Bashkuara sinjalizuan se janë “më se të afta” për të rifilluar luftën me Iranin nëse është e nevojshme, ndërsa fati i një marrëveshjeje të mundshme mes Washingtonit dhe Teheranit mbetet i paqartë.
“Ne jemi më se të aftë, rezervat tona janë më se të përshtatshme për këtë, si atje ashtu edhe në mbarë globin, për shkak të mënyrës se si balancojmë municionet e avancuara dhe ato më të shumta,” tha sekretari amerikan i Mbrojtjes, Pete Hegseth, gjatë një samiti të madh të mbrojtjes në Azi të shtunën.
“Jemi në një pozitë shumë të mirë,” shtoi ai.
Komanda Qendrore e SHBA-së (CENTCOM) e përsëriti këtë qëndrim në X, duke deklaruar se forcat amerikane “mbeten të pranishme dhe vigjilente në të gjithë rajonin”.
Negociatorët amerikanë dhe iranianë arritën të enjten një marrëveshje kornizë të përkohshme për të zgjatur armëpushimin e luftës me Iranin edhe për 60 ditë dhe për të nisur negociatat mbi programin bërthamor të Iranit drejt një marrëveshjeje përfundimtare.
Megjithatë, propozimi duhej të miratohej nga presidenti amerikan Donald Trump, i cili tha se do të merrte “vendimin përfundimtar” në një takim të ardhshëm.
“Irani duhet të pajtohet se nuk do të ketë kurrë armë apo bombë bërthamore. Ngushtica e Hormuzit duhet të jetë menjëherë e hapur, pa tarifa, për trafik të pakufizuar detar në të dy drejtimet. Të gjitha minat detare (bombat), nëse ka, duhet të hiqen,” shkroi Trump në Truth Social.
Trump u takua me këshilltarët e tij për dy orë në Dhomën e Situatave të Shtëpisë së Bardhë të premten, por takimi përfundoi pa një vendim, sipas një zyrtari të lartë të administratës.
Zyrtari, i cili foli në kushte anonimiteti, tha se Trump do të nënshkruante vetëm një marrëveshje që përmbushte vijat e tij të kuqe, përfshirë garancinë se Teherani nuk do të ishte kurrë në gjendje të zhvillonte armë bërthamore.
Para përfundimit të takimit, zëdhënësi i Ministrisë së Jashtme të Iranit, Esmail Baghaei, u tha mediave shtetërore se asnjë marrëveshje nuk ishte finalizuar ende. Ai shtoi se negociatorët ishin të përqendruar kryesisht në përfundimin e luftës dhe nuk po diskutonin aktualisht detajet e programit bërthamor të Iranit.
Programi bërthamor i Iranit mbetet një nga pengesat kryesore në negociata. Teherani e ka kundërshtuar vazhdimisht këtë kërkesë, duke këmbëngulur se aktivitetet e tij bërthamore kanë vetëm qëllime paqësore dhe civile.
Negociatorët kryesorë iranianë gjithashtu shprehën mungesë besimi ndaj “garancive apo fjalëve”, duke insistuar se vetëm veprimet kanë rëndësi, një pasqyrim i mosbesimit të thellë që vazhdon të ekzistojë mes dy vendeve.
“Asnjë hap nuk do të merret para se pala tjetër të veprojë,” shkroi në X kryetari i Parlamentit të Iranit, Mohammad-Bagher Ghalibaf. “Ne nuk marrim lëshime përmes bisedimeve, por përmes raketave.”
Si Irani ashtu edhe SHBA-ja e kanë akuzuar njëri-tjetrin për shkelje të armëpushimit që nga hyrja e tij në fuqi rreth shtatë javë më parë. Megjithatë, negociatat mes dy palëve kanë vazhduar./reporteri
