Gaza/ Izraeli urdhëron evakuimin e palestinezëve në disa zona në veri të vendit
Izraeli ka lëshuar një urdhër për evakuimin e palestinezëve në ca zona në veri të Rripit të Gazit, të cilat ishin edhe shënjestrat e para në fillimin e luftës në 7 tetor 2023. Urdhri erdhi menjëherë pasi Hamasi lëshoi një seri raketash kundrejt Izraelit.
Urdhri u lëshua për dy zona thuajse të shkatërruara, Beit Hanoun dhe Beit Lahiya. Në to, u shfaqën tanket izraelite, duke paralajmëruar kështu nisjen e një ofensive të re tokësore. Grupi i Hamasit zgjodhi edhe liderin e ri, Yahya Sinëar, i cili është edhe arktitekti i sulmit të 7 tetorit, ku grupimi terrorist sulmoi Izraelin dhe mori peng 250 njerëz.
Tiranë/ Një i moshuar vret me bastun shokun e dhomës në azil
Në një azil privat në Tiranë, një i moshuar 78-vjeçar ka vrarë me bastun shokun e dhomës, 82 vjeç. Efektivët e policisë arrestuan 78-vjeçarin në flagrancë, i cili akuzohet për veprën “vrasje me dashje”, sipas nenit 76 të Kodit Penal.
78-vjeçari me inicialet Z.Sh. dyshohet se në orët e para të mëngjesit të ditës së sotme (8 gusht 2024) ka goditur disa herë me bastun shokun e dhomës dhe si pasojë e lëndimeve të marra, ai ka ndërruar jetë.
Probleme në softuerët/ Tesla tërheq mbi 1.6 milionë makina nga tregu
Tesla ka tërhequr mbi 1.6 milionë makina në Kinë, me qëllim që të rregullojë softuerin, për t’u siguruar që shoferi të paralajmërohet nëse bagazhi i automjeteti nuk është kyçur. Gjithashtu, për makinat që kanë bravë të dëmtuar të bagazhit, riparimi do të kryhet pa pagesë.
Disa nga automjetet e tërhequra janë të modelit S, X dhe Y dhe janë prodhuar në Kinë që prej 15 tetorit 2023 dhe 17 korrikut 2024. Tërheqja nga tregu erdhi pasi është prezente mundësia që kapaku i bagazhit të hapet gjatë lëvizjes, duke sjellë shqetësime shoferit. Nuk dihet nëse ka pasur raportime nga blerës së Tesla-s për një problematikë të tillë, apo është vënë re nga inxhinierët.
Rusi/ Ministria e Mbrojtjes ruse pretendon se ka rrëzuar 11 drone ukrainase
Ministria e Mbrojtjes ruse ka bërë një deklaratë, në të cilën shprehet se janë rrëzuar 11 dronë të lëshuar nga Ukraina në 4 rajone ruse. Sipas ministrisë, sistemet e mbrojtjes ajrore penguan dhe shkatërruan 3 dronë në rajone të ndryshme, duke shmangur dëme dhe viktima.
Edhe më 6 gusht, zyrtarët e zonës së Kursk-ut raportuan për sulme me dronë dhe granata nga ana e Ukrainës. Nga ana tjetër, Forcat Ajrore ukrainase thanë se kanë përballuar kërcënimet ruse me dronë, në disa territore të vendit, duke aktivizuar sistemet e mbrojtjes ajrore.
