Ministria e Arsimit dhe Shkencës ndan 80 bursa për nxënësit e shkollave të mesme profesionale
Gjatë një takimi në Kremlin me të dërguarit amerikanë Steve Witkoff dhe Jared Kushner, presidenti rus Vladimir Putin paralajmëroi se vendosja e trupave të huaja në Ukrainë, pas nënshkrimit të mundshëm të një marrëveshjeje paqeje, do të nënkuptonte vazhdimin e luftës. Moska e hedh poshtë mundësinë e një pranie ushtarake evropiane në territorin ukrainas, ndërsa Uashingtoni pretendon se është bërë përparim në negociata dhe ka njoftuar përfshirjen e vendeve evropiane në raundin e ardhshëm të bisedimeve.
Sipas portalit kroat Index.hr, gjatë një takimi të zhvilluar më 12 nëntor, Putin përsëriti se Rusia nuk do të pranonte asnjë prani ushtarake të huaj në Ukrainë, madje as pas përfundimit të mundshëm të konfliktit.
Paralajmërimi i tij lidhet kryesisht me planet e Francës dhe të Britanisë së Madhe për të krijuar një forcë shumëkombëshe, e cila do të vendosej në Ukrainë pasi të kishin pushuar luftimet.
Kjo forcë do të kishte për qëllim të ndihmonte në rindërtimin dhe forcimin e ushtrisë ukrainase, të siguronte hapësirën ajrore dhe të ofronte mbështetje për sigurinë detare. Megjithatë, ajo nuk do të kishte një mandat tradicional për ruajtjen e paqes apo për vëzhgim.
“Evropianët janë të vetëdijshëm për këtë. Dhe çfarë dëgjojmë prej tyre? Se sapo të nënshkruhet një marrëveshje paqeje, ata do të dërgojnë menjëherë trupa në territorin ukrainas,” deklaroi Putin.
Më pas, ai lëshoi një paralajmërim të drejtpërdrejtë për shtetet evropiane.
“Çfarë do të thotë kjo? Ne kemi folur tashmë për këtë: për ne, ata janë një objektiv legjitim, që do të thotë se lufta do të fillonte sërish menjëherë,” deklaroi presidenti rus. Putin hedh poshtë zonat e çmilitarizuara dhe kërkon kufij të qartë.
Presidenti rus theksoi se Moska nuk do të bëjë kompromise lidhur me territoret që ajo pretendon.
Sipas tij, Rusia e hedh poshtë mundësinë e krijimit të zonave të çmilitarizuara — ose të ashtuquajturave “zona gri” — midis pozicioneve të ushtrisë ruse dhe asaj ukrainase.
“Për ne, ekziston vetëm një vijë demarkacioni: kufiri shtetëror. Atëherë gjithçka do të jetë e qartë dhe e thjeshtë — ju jeni në këtë anë, ndërsa ne jemi në atë anë,” deklaroi Putin.
Ndihmësi i tij, Yuri Ushakov, konfirmoi se pala ruse u ka përcjellë gjithashtu qartë të dërguarve amerikanë kërkesën që NATO-ja të mos zgjerohet më tej. Këto qëndrime tregojnë se, pavarësisht kontakteve të vazhdueshme diplomatike, Moska nuk po heq dorë nga kërkesat kyçe që ka vendosur si kushte për arritjen e një marrëveshjeje paqeje.
Megjithatë, ai nuk dha shumë detaje lidhur me rezultatet konkrete të diskutimeve.
Nga pala ruse, Yuri Ushakov e cilësoi takimin si të dobishëm dhe njoftoi se Putini planifikon të diskutojë për Ukrainën me presidentin amerikan Donald Trump gjatë samitit të Bashkëpunimit Ekonomik Azi-Paqësor (APEC), i cili pritet të mbahet javën e ardhshme në Shenzhen të Kinës.
Gjatë takimit, Putini propozoi gjithashtu organizimin e një misioni humanitar në qytetin Kostiantynivka, në rajonin e Donjeckut. Presidenti rus pretendon se forcat e tij e kontrollojnë qytetin dhe se Moska është e gatshme të garantojë sigurinë e një operacioni humanitar, të destinuar për rreth 500 civilët që kanë mbetur aty.
Ukraina, megjithatë, i kundërshton pretendimet ruse për kontrollin mbi Kostiantynivkën, duke deklaruar se disa nga luftimet më të ashpra po zhvillohen ende në atë zonë.
Dmytro Lytvyn, një këshilltar i presidentit ukrainas, paralajmëroi se Rusia mund ta shfrytëzojë misionin humanitar për qëllime ushtarake.
Ai përmendi një incident të mëparshëm në Oleshky-n e pushtuar, ku, sipas palës ukrainase, Moska përdori një operacion humanitar për të bërë rotacionin e trupave dhe për të sjellë pajisje ushtarake.
Evropianët do t’u bashkohen negociatave
Një nga njoftimet e rëndësishme pas takimit në Kremlin ka të bëjë me përfshirjen e vendeve evropiane në raundin e ardhshëm të bisedimeve për paqe.
Witkoff konfirmoi se përfaqësuesit evropianë do të marrin pjesë drejtpërdrejt në diskutimet e ardhshme.
“Evropianët do të bashkohen në takimin e radhës. Ne besojmë se ky është një moment shumë i rëndësishëm, pasi ata janë partnerët tanë dhe për ne është thelbësore që ata të marrin pjesë,” deklaroi i dërguari amerikan.
Sipas agjencisë AFP, gjatë bisedimeve në Moskë, delegacioni amerikan i kërkoi në mënyrë eksplicite Putinit që të pranojë pjesëmarrjen e përfaqësuesve evropianë.
Në fillim të takimit, Jared Kushner foli për diskutimet që Uashingtoni ka zhvilluar me vendet evropiane lidhur me arkitekturën e ardhshme të sigurisë në kontinent. Sipas tij, qëllimi është të krijohet një sistem që do të mundësonte dhënien fund të luftës aktuale, duke parandaluar njëkohësisht shpërthimin e një konflikti të ri.
