“Edhe sa gra të vrara”, në Pejë kërkohet drejtësi për Arlinda Zekajn
Edicioni i 13-të i Festivalit të Filmit të Shkurtër në Korçë do të sjellë rreth 100 filma nga mbi 40 vende të botës, duke e kthyer qytetin në një pikëtakim të kineastëve, regjisorëve dhe producentëve, të cilët përmes gjuhës së filmit prezantojnë histori, këndvështrime dhe forma të ndryshme të rrëfimit kinematografik.
Nën moton “What We Ignore Remains”, festivali do të zgjasë gjashtë ditë, gjatë të cilave publiku do të ketë mundësi të ndjekë prodhime që trajtojnë çështje të rëndësishme shoqërore, mjedisore dhe njerëzore.
Edhe pse filmat në konkurrim nuk i bashkon një temë e vetme, shqetësimet për mjedisin dhe shkatërrimin e natyrës zënë një vend të rëndësishëm në rrëfimet kinematografike, krahas temave të tjera sociale që pasqyrojnë realitete dhe sfida të ndryshme të shoqërive bashkëkohore.
Një nga veçoritë e këtij edicioni është zgjerimi i formateve dhe kategorive filmike. Përveç filmave artistikë dhe dokumentarë, programi përfshin edhe filma të animuar, eksperimentalë, krijime në realitetin virtual, si dhe prodhime të realizuara përmes inteligjencës artificiale.
Kështu, festivali synon të sjellë në vëmendje jo vetëm tema që kërkojnë reflektim, por edhe mundësitë e reja të shprehjes artistike dhe ndikimin e teknologjisë në të ardhmen e kinematografisë.
Pjesë e këtij edicioni janë edhe filma të autorëve shqiptarë, duke i dhënë hapësirë krijimtarisë vendore në një program ndërkombëtar që bashkon perspektiva dhe përvoja të ndryshme kinematografike.
Përgjatë gjashtë ditëve, Korça do të shndërrohet në një hapësirë takimi dhe shkëmbimi artistik, ku filmi i shkurtër bëhet mjet për të trajtuar realitete që shpesh mbeten jashtë vëmendjes publike. Vetë motoja e festivalit, “What We Ignore Remains”, nënvizon rëndësinë e përballjes me çështjet që shoqëria zgjedh t’i anashkalojë./KultPlus.com
