OpenAI po shqyrton “ngadalësimin” e zhvillimit të inteligjencës artificiale të avancuar
Rusia ka dërguar dy grupe anijesh të lidhura me operacionet e saj të transportit ushtarak në Detin Mesdhe, me destinacion portin sirian të Tartusit.
Sipas “The Maritime Executive”, më 11 shtator në Mesdhe ndodheshin tri grupe të veçanta anijesh ruse me ngarkesa ushtarake, dy prej të cilave lidhen me operacionet ruse të transportit ushtarak detar.
Grupi i parë përfshin destrojerin kundër nëndetëseve të klasës Udaloy, “Admiral Levchenko”, cisternën “General Skobelev”, anijen e mallrave “Sparta” dhe anijen furnizuese “Akademik Pashin”. Këto anije hynë në Mesdhe përmes ngushticës së Gjibraltarit më 27 gusht.
Grupi besohet se ka mbërritur në Tartus më 7 shtator, ku “Sparta” u pa duke shkarkuar mallra. Imazhet satelitore të 11 shtatorit treguan gjithashtu një anije luftarake ruse pranë “General Skobelev”.
Ndërkohë, një grup i dytë rus po lëviz drejt Tartusit. Ai udhëhiqet nga anija desantuese e klasës Ropucha “Aleksandr Shabalin” dhe përfshin anijet e mallrave “Anastasiia” dhe “Yuriy Arshenevskiy”, të cilat janë nën sanksione dhe më herët janë lidhur me transportin e pajisjeve ushtarake.
“Shabalin” mund të transportojë automjete dhe ngarkesa të tjera, ndërsa është e armatosur për eskortë. Autokolona u zbulua më 10 shtator mes Siçilisë dhe Tunizisë dhe po monitorohej nga një avion patrullimi detar italian.
Ky dislokim shënon një ndryshim të situatës në Mesdhe, pasi në korrik Rusia nuk kishte asnjë anije luftarake në këtë zonë, për herë të parë që nga viti 2013.
