Messit i dedikohet minuta e 10-të në të gjitha ndeshjet e Argjentinës
Ministri gjerman i Punëve të Jashtme, Johann Wadephul, ka falënderuar homologët e tij francez dhe polak për solidaritetin e tyre “të fuqishëm”, pasi Berlini akuzoi zyrtarisht Moskën për sulme hibride dhe një tentativë për sulm me dron në Aeroportin e Leipzigut të Gjermanisë, transmeton Anadolu.
“Incidenti në Aeroportin e Leipzigut na tregoi edhe një herë neve në Gjermani se agresioni i Rusisë nuk ndalet në kufij, as në lumin Bug, as në Oder dhe madje as në Rhine”, tha Wadephul në një konferencë të përbashkët për media me kryediplomatët e Francës dhe Polonisë në Weimar.
“E vlerësojmë jashtëzakonisht shumë solidaritetin dhe mbështetjen që partnerët tanë na kanë treguar që nga dje”, tha ai, duke iu referuar deklaratave të partnerëve të BE-së dhe NATO-s.
Ai shtoi se aleatët janë të bashkuar dhe të vendosur për të vazhduar përpjekjet e tyre për të frenuar Rusinë dhe për t’i ofruar mbështetje Ukrainës.
Wadephul tha se Gjermania “nuk ka iluzione” për Rusinë dhe se Berlini dhe aleatët e tij mbeten të gatshëm të “angazhohen në një dialog të arsyeshëm” me Moskën nëse Kremlini ndryshon politikat e tij ndaj Evropës.
“Parakusht për këtë është që Rusia më në fund t’i japë fund luftës së saj agresore kundër Ukrainës dhe mbi të gjitha të përmbahet nga të gjitha llojet e sulmeve kundër nesh. Ne vazhdimisht duhet të përballemi me shkelje të sovranitetit nga Rusia dhe kjo duhet të ndalet”, tha ai.
Kryediplomati gjerman theksoi se rikthimi në marrëdhënie normale me Rusinë, nga këndvështrimi i sotëm, duket “shumë larg”.
“Megjithatë, gatishmëria themelore për ta bërë këtë mbetet”, shtoi ai. /Anadolu Agency/
