Shpërthime u raportuan në disa pjesë të Iranit herët të martën, ndërsa ushtria amerikane tha se kishte përfunduar një valë të re sulmesh ndaj objektivave në të gjithë vendin.
Agjencia e lajmeve Tasnim e Iranit raportoi shpërthime në Konarak, në provincën juglindore të Sistan-Baluchestan, dhe në qytetin portual të Chabahar në Gjirin e Omanit.
Televizioni shtetëror iranian Press TV raportoi gjithashtu sulme amerikane pranë qytetit Shiraz në Iranin jug-qendror, ndërsa agjencia e lajmeve Fars njofton se disa shpërthime u dëgjuan rreth ishullit Qeshm në ngushticën e Hormuzit dhe pranë qytetit jugor të Bandar Abbas.
Komanda Qendrore e SHBA-së (CENTCOM) ka shkruar në Platformën X se kishte përfunduar raundin e saj të fundit të sulmeve. Sulmi zgjati pesë orë, sipas burimeve ushtarake amerikane.
“Forcat amerikane sulmuan qendrat e komandës ushtarake të Iranit, objektet detare, vendet e lëshimit të raketave dhe dronëve, si dhe sistemet e mbrojtjes ajrore për të dobësuar aftësinë e Iranit për të vazhduar sulmin ndaj anijeve tregtare që kalonin nëpër ngushticën e Hormuzit”.
Sulmet shënuan natën e dhjetë radhazi të sulmeve amerikane ndaj objektivave në Iran pasi Teherani u hakmor kundër vendeve që strehonin baza ushtarake amerikane në rajon. /RTKlive
