Kryeministri i Shqipërisë, Edi Rama, ka deklaruar se protestat qytetare kanë rëndësinë e tyre si shprehje e shqetësimeve të qytetarëve, por sipas tij, në to shpesh përfshihen edhe individë që ai i cilësoi si “zemërakë dhe dështakë”.
Deklaratat Rama i bëri gjatë pjesëmarrjes në Edicionin e Tretë të Javës së Administratës Publike, me fokus shërbimin publik dhe përmirësimin e administratës në Shqipëri.
Ai theksoi se qytetarët kanë të drejtë të kërkojnë shërbime më të mira dhe trajtim më dinjitoz nga institucionet shtetërore, duke shtuar se ndjenja e pakënaqësisë shpesh lidhet me problematika konkrete në administratë.
Rama solli si shembull edhe vështirësitë që qytetarët hasin në sistemin shëndetësor, duke përmendur pritjet e gjata dhe mungesën e shërbimeve në kohë si arsye të revoltës publike.
Sipas tij, transformimi i administratës është një proces i gjatë dhe kompleks, ndërsa theksoi se po bëhen përpjekje për forcimin e institucioneve dhe luftën kundër korrupsionit.
