Lideri amerikan, presidenti i SHBA-së, Donald Trump, po mundohet të minimizojë shqetësimet në lidhje me koston e jetesës së qytetarëve.
Ai së fundi ka nënshkruar një urdhër ekzekutiv që lejon një gamë të gjerë produktesh ushqimore, përfshirë kafenë, bananet dhe mishin e viçit, t’i shpëtojnë tarifave të tij të gjera.
Kjo lëvizje e tij vjen pak pasi administrata e tij përballet me presion në rritje për shkak të rritjes së çmimeve. Dhjetëra produkte të përfshira në listën e përjashtimeve të Shtëpisë së Bardhë variojnë nga avokadot dhe domatet te kokosi dhe mangot.
Këto mallra, tha administrata Trump të premten, nuk mund të prodhohen në sasi të mjaftueshme brenda vendit.
Sipas Trump taksat janë të nevojshme për të zvogëluar deficitin tregtar të SHBA-së – hendekun midis vlerës së mallrave që blen nga vendet e tjera dhe atyre që u shet atyre.
