Komiteti i Kombeve të Bashkuara kundër Torturës (CAT) do të zhvillojë sesionin e tij më të fundit nga 10 deri më 28 nëntor në Gjenevë, gjatë të cilit do të shqyrtojë katër vende: Izraelin, Argjentinën, Bahreinin dhe Shqipërinë.
Këto vende janë pjesë e 175 shteteve palë të Konventës kundër Torturës dhe Trajtimit Ose Dënimit Çnjerëzor apo Degradues, që parashikon shqyrtime periodike nga një komitet prej 10 ekspertësh të pavarur ndërkombëtarë.
Shqipëria pritet të përballet me pyetje mbi zbatimin e konventës në praktikë, përfshirë trajtimin e të paraburgosurve, kushtet në qendrat e ndalimit, hetimet për abuzime policore dhe mbikëqyrjen e institucioneve për të drejtat e njeriut.
Sipas agjendës zyrtare, dialogu publik për Shqipërinë do të zhvillohet më 19 nëntor (10:00–13:00) dhe 20 nëntor (15:00–18:00) me orën e Gjenevës.
Gjatë këtyre seancave, përfaqësues të qeverisë shqiptare do të paraqesin raportin kombëtar, ndërsa anëtarët e Komitetit do të paraqesin pyetje dhe vërejtje mbi progresin dhe sfidat.
Komiteti ka marrë gjithashtu raporte nga organizatat joqeveritare dhe aktorë të tjerë të shoqërisë civile, të cilat do të ndihmojnë në vlerësimin e gjendjes reale në terren.
Pas përfundimit të sesionit, do të publikohen rekomandimet për secilin vend, përfshirë edhe Shqipërinë. /Albanianpost.com
