Cristiano Ronaldo ka njoftuar përfundimin e aventurës së tij me klubin saudit Al Nassr përmes një postimi enigmatik në rrjetet sociale: “Ky kapitull përfundoi. Tregimi? Ende ka për t’u shkruar. Falemnderit të gjithëve.”, ka shkruar ai.
Ky njoftim erdhi menjëherë pas ndeshjes së fundit të sezonit, ku Al Nassr u mposht 3-2 nga Al Fateh, pavarësisht se Ronaldo shënoi një gol.
Gjatë qëndrimit të tij në Al Nassr, Ronaldo shënoi 93 gola në 105 ndeshje dhe fitoi vetëm Kupën e Kampionëve Arabë. Megjithatë, klubi nuk arriti të sigurojë titullin e ligës dhe nuk u kualifikua për Ligën e Kampionëve të Azisë.
Në aspektin personal, Ronaldo arriti një tjetër rekord duke shënuar golin e tij të 800-të në nivel klubesh, duke u bërë lojtari i parë në histori që arrin këtë shifër.
E ardhmja e tij mbetet e pasigurt, por ka spekulime për një transferim të mundshëm në një klub pjesëmarrës në Kupën e Botës për Klube, e cila do të mbahet në SHBA nga 14 qershori deri më 13 korrik 2025. FIFA ka hapur një dritare speciale transferimi nga 1 deri më 10 qershor për këtë turne.
Presidenti i FIFA-s, Gianni Infantino, ka përmendur se Ronaldo është në bisedime me disa klube për një transferim të mundshëm, duke përfshirë edhe një klub brazilian të paemëruar.
Pavarësisht këtyre spekulimeve, nuk ka ende një konfirmim zyrtar për klubin e ardhshëm të Ronaldos. Ndërkohë, ai mbetet një nga lojtarët më të suksesshëm dhe të ndjekur në botën e futbollit. /KosovaPress/
