Kanada ka bërë një kthesë të rëndësishme në marrëdhëniet e saj me monarkinë britanike, duke ftuar Mbretin Charles III të hapë parlamentin dhe të mbajë Fjalimin nga Froni, një ngjarje që nuk ka ndodhur prej më shumë se 60 vjetësh, shkruan Gazeta Sinjali.
Ky vendim, i shpallur nga Kryeministri Mark Carney, përbën një sinjal të fortë të sovranitetit dhe veçantisë së Kanadasë si monarki kushtetuese, duke i kundërvënë retorikës së ashpër të presidentit amerikan Donald Trump, i cili e ka përshkruar vendin si një “shtet të 51-të” të SHBA-së.
Në vitin 2011, lidhjet me Kurorën ishin në një fazë tjetër, kur kryeministri konservator Stephen Harper shkaktoi një debat duke vënë në dukje simbolikën e monarkisë në Kanadë, ndërsa pasardhësi i tij, liberalja Justin Trudeau, bëri hapa drejt distancimit nga ajo duke larguar portretin e Mbretëreshës dhe duke rikthyer simbolet lokale. Por tani, me ftesën për Mbretin Charles III, Kanadaja riafirmon lidhjet e saj me Kurorën britanike, duke treguar se mbetet një monarki kushtetuese me tradita të thella parlamentare dhe institucionale, transmeton BBC.
Historianët e Kanadasë theksojnë se megjithë indiferencën e shumicës së popullsisë moderne ndaj monarkisë, veprimi i Carney është një deklaratë e fuqishme politike dhe kulturore. Ai tregon se Kanadaja dëshiron të ruajë dhe forcojë sovranitetin e saj në një kohë kur marrëdhëniet me SHBA-të janë sfiduar nga politika proteksioniste dhe tarifat ekonomike të vendosura nga administrata Trump.
Monarku britanik nuk ka hapur parlamentin kanadez që nga viti 1957 dhe nuk ka mbajtur fjalimin para fronit që nga viti 1977, duke e bërë këtë vizitë një ngjarje shumë të rrallë dhe historike për vendin. Në të njëjtën kohë, Kanadaja përballet me sfida të brendshme, sidomos nga provinca e Kebekut, ku forca separatiste vazhdojnë të kërkojnë shkëputjen nga monarkia dhe rikonfirmimin e identitetit lokal. Sidoqoftë, ndryshimet kushtetuese dhe veprimet e kohëve të fundit tregojnë një vendosmëri për të ruajtur unitetin dhe lidhjet historike me Kurorën.
Ky zhvillim vjen në një moment të rëndësishëm për Kanadanë, e cila në vitin 1982 mori në dorë sovranitetin e plotë me riatdhesimin e kushtetutës, por që edhe sot vazhdon të ruajë simbolet dhe institucionet e saj monarkike në një kuptim modern. Ftesa për Mbretin Charles III nuk është vetëm një akt simbolik, por edhe një përpjekje për të riafirmuar vlerat dhe traditat që dallojnë Kanadanë nga fqinjët e saj amerikanë.
