Nuri Sahin, trajneri i ri i Borussia Dortmund-it, po kalon një nga momentet më të komplikuara të karrierës së tij në krye të skuadrës gjermane. Madje, ai mund të jetë duke përjetuar ditët e fundit si trajner i verdhezinjëve, thonë raportet nga “Sky Germany”.
Pas një fillimi zhgënjyes në Bundesliga, kambanat e alarmit ranë përfundimisht në Champions League, kur skuadra u rrëzua gjatë vizitës së saj në “Santiago Bernabeu”. Ndonëse Dortmund-i shkoi në pushim me dy gola epërsi ndaj Real Madrid-it, ata përfunduan duke pësuar një humbje të fortë 5-2, e cila e ka vendosur Sahin-in në qendër të kritikave.
Rënia në “Bernabeu” zbuloi disa nga vendimet më të diskutueshme të trajnerit turk, veçanërisht qasjen e tij në pjesën e dytë.
Me epërsinë 0-2, Sahin vendosi të bëjë ndryshime në mbrojtje që çekuilibruan skuadrën, duke lënë hapësira që sulmuesit e Real Madrid-it nuk ngurruan t’i shfrytëzonin.
Vinicius Jr ishte ekzekutuesi kryesor, duke shënuar një hat-trick dhe duke rikthyer të bardhët në rrugën e fitores. Ky rezultat jo vetëm që preku skuadrën në klasifikim, por cenoi edhe besimin te trajneri.
Tifozët e Borussia Dortmund-it, kërkues dhe të vetëdijshëm për historinë e pasur të klubit, nxituan të vinin në dukje Sahin-in si personin kryesor përgjegjës për humbjen.
Zhurmat e pakënaqësisë janë shndërruar në zëra që kërkojnë shkarkimin e tij, veçanërisht pasi panë sesi skuadra nuk arriti të ruajë avantazhin e saj në një skenë aq të rëndësishme sa “Bernabeu”.
Me akumulimin e rezultateve negative, dyshimet për aftësinë e tij për të udhëhequr ekipin në momente vendimtare bëhen më të dukshme.
E ardhmja e Nuri Sahin-it te Borussia Dortmund-i duket e pasigurt. Drejtuesit e klubit mund të marrin masa drastike nëse rezultatet nuk përmirësohen në javët në vijim. /Albanianpost.com
