Një yll i Premier League thuhet se rrezikon të marrë një dënim të përjetshëm pasi dolën më shumë detaje të rastit të tij.
Mesfushori i West Ham-it, Lucas Paqueta ka qenë subjekt i një hetimi të gjatë nga Federata Angleze (FA), pasi u akuzua për shkelje të supozuara të rregullave E5 dhe F3, në lidhje me përfshirjen e tij në base.
Hetimi sillet rreth aktivitetit të dyshimtë të basteve në lidhje me katër kartonët e verdhë që ai mori në Premier League kundër Bournemouth, Aston Villa, Leeds dhe Leicester City.
Paqueta akuzohet se ishte ndëshkuar qëllimisht dhe më vonë u zbulua se një “numër më i madh se zakonisht bastesh” ishin vendosur në Brazilin e tij të lindjes.
Rreth 60 baste u vendosën për kartonët e verdhë, që varionin nga 7 deri në 400 paundë dhe me fitime totale prej 100 mijë paundë.
Ish-ylli i Lyon-it dhe Milan-it ka pretenduar pafajësinë e tij dhe ka bashkëpunuar duke i dorëzuar celularin e tij FA-së.
Organi qeverisës i futbollit të Anglisë kishte pajisjen e tij për rreth tetë javë dhe shqyrtoi historinë e thirrjeve dhe mesazheve të tij, si dhe të dhënat e tij bankare.
Pas kthimit të tij, Paqueta besohet se ka marrë një telefon zëvendësues.
Megjithatë, “The Sun” thotë se ai hodhi celularin e vjetër dhe kjo po e vendos atë në më shumë telashe.
FA kërkoi akses të mëtejshëm në telefonin e Paqueta-s për të përfunduar kontrollet e nevojshme, por ai nuk mundi ta gjente celularin, duke çuar në dy shkelje të rënda të Rregullit të FA-së “F3” duke u akuzuar për pengim dhe mosbashkëpunim në hetimin fillestar.
Paqueta ka luajtur për West Ham-in, si dhe shënoi në fitoren 4-1 ndaj Ipswich Town në fundjavë.
Seanca dëgjimore e tij është planifikuar të zhvillohet në mars dhe me gjasë nuk do të përfundojë deri në verë.
Prandaj, Paqueta pritet të jetë në dispozicion për pjesën e mbetur të fushatës 2024-25.
Pretendohet se FA i konsideron shkeljet e supozuara si më serioze se incidentet e mëparshme dhe po shtyn për një ndalim të përjetshëm. /Albanianpost.com
