Kryeministri i Kosovës, Albin Kurti, i shoqëruar nga ministrja e Arsimit, Arbërie Nagavci, dhe zëvendësministri i Punëve të Brendshme, Bardhyl Dobra, vizituan Institutin Francez të Kosovës, në Prishtinë.
Me këtë rast kryeministri Kurti është pritur nga ambasadori i Francës në Kosovë, Oliver Geurot.
Kurti në një prononcim para gazetarëve tha se mësimi i gjuhës frënge është përparësi shumë e madhe, duke inkurajuar të gjithë qytetarët e vendit që ta mësojnë gjuhën dhe ta njohin kulturën frënge.
“IFK është dritare e jashtëzakonshme për kulmin e cilësisë së artit dhe kulturës frënge. Ky institut është urë e re midis Kosovës dhe Francës, midis gjuhëve tona”, tha Kurti.
Ky Institut i inauguruar në vitin e kaluar po bëhet vitrinë për përhapjen e gjuhës frënge dhe kulturës frankofone. IFK është njëkohësisht një qendër e kurseve të gjuhës për publikun e gjerë që do t’i hapë dyert për kursistët e parë këtë muaj. Ai do të jetë një mbështetje për mësimdhënësit e gjuhës frënge në shkollat kosovare dhe një vend për trajnime gjuhësore për nëpunësit civilë kosovarë.
Nga ana e tij, ambasadori francez, Oliver Geurot, foli për aktivitetin e Institutit Francez të Kosovës, në organizimin e kurseve të gjuhës frënge, aktivitete kulturore. /RTK/
