Borussia Dortmund i ka hedhur sytë te Mason Greenwood si një përforcim i mundshëm për sezonin e ardhshëm, në përpjekje për të kompensuar largimin e afërt të Jadon Sancho-s, i cili do të kthehet te Manchester United në fund të sezonit.
Sipas “Daily Mail”, klubi gjerman është duke e vlerësuar seriozisht mundësinë e afrimit të sulmuesit të ri anglez në merkaton e verës.
Greenwood, i cili gjithashtu do të kthehet në “Old Trafford” pas huazimit të tij te Getafe, përballet me një të ardhme të pasigurt me vetëm një vit të mbetur në kontratën e tij dhe pa qartësi mbi rolin e tij në ekip nën menaxherin e ri që pritet te Manchester United.
Situata e Sancho-s është po aq e pasigurt, pasi e ardhmja e tij do të varet nga trajneri i ardhshëm që do të vijë te klubi anglez, duke qenë se Erik ten Hag duket se i ka ditët e numëruara në stolin e “Djajve të Kuq”.
Sulmuesi 22-vjeçar ka pasur një sezon të jashtëzakonshëm te Getafe, ku ka shënuar 10 gola dhe ka dhënë 6 asistime në 36 ndeshje. Performanca e tij ka tërhequr vëmendjen e Borussia Dortmund, e cila është në kërkim të një lojtari me profilin e tij për të ruajtur konkurrencën në Bundesliga dhe në kompeticionet evropiane.
Greenwood ofron rininë, talentin dhe aftësinë për të performuar në pozicione të ndryshme sulmuese, duke e bërë atë një opsion tërheqës për ekipin gjerman.
Shkëmbimi i mundshëm i destinacioneve midis Sancho dhe Greenwood mund të jetë i dobishëm për të dy klubet.
Ndërsa Manchester United mund të rikthejë një Sancho të ripërtërirë të gatshëm për të kontribuar pas periudhës së tij te Dortmund, Greenwood do të kishte mundësinë të zhvillohet dhe të shkëlqejë në një mjedis të ri konkurrues.
Për më tepër, Borussia Dortmund është dëshmuar të jetë terren pjellor për rritjen e talenteve të rinj, gjë që mund të jetë një nxitje shtesë për Greenwood.
Me afrimin e merkatos së verës, situata e këtyre lojtarëve do të jetë një nga fokuset e vëmendjes. Vendimet e marra nga United dhe Dortmund mund të kenë një ndikim të rëndësishëm në sezonin e ardhshëm dhe të ardhmen e këtyre yjeve premtues të futbollit anglez./Albanianpost.com
