Sulmuesi i Kombëtares së Shqipërisë, Armando Broja, mund të përfundojë në Serie A te skuadra e Milan-it. Sipas gazetës torineze “Tuttosport”, kuqezinjtë kanë gati ofertën prej 35 milionë eurosh për lojtarin e Chelsea-t.
Raporti tregon se Broja është profili i duhur i lojtarit që përshtatet me projektin e Milan-it, ndaj dhe klubi italian insiston në nënshkrimin e tij.
Ai fillimisht luajti në huazim në Holandë, te Vitesse, ku filloi të bënte emër. Vitin e kaluar, ai luajti rregullisht në Premier League ku ishte te Southampton i huazuar nga Blutë dhe shënoi nëntë gola në 38 ndeshje dhe kështu fitoi besimin e tyre për sezonin aktual.
Megjithatë, Broja po gjen pak hapësira këtë vit me 18 paraqitje, por vetëm tre si titullar, duke shënuar një gol kundër Wolverhampton.
Në fakt, presidenti i Federatës Shqiptare të Futbollit, Armand Duka, deklaroi së fundmi se “Ishte më mirë kur ishte në Southampton dhe luante gjithmonë titullar. Tani luan 15-20 minuta çdo ndeshje dhe nuk është njësoj”.
Milan-i sigurisht që mund t’i ofrojë atij një rol më qendror brenda projektit. Kontrata e Brojes me Chelsea perfundon ne veren e 2025. Ai vlerësohet 35 milionë euro, por mund të mbërrijë fillimisht në huazim.
Një tjetër rrugë që mund ta çojë Brojën drejt Milan-it është dhe Rafael Leao. Portugezi nuk po rinovon ende me kuqezinjtë, teksa Chelsea synon transferimin e tij.
Nuk përjashtohet mundësia që nëse Leao kalon në “Stamford Bridge”, kartoni i Brojës t’i ofrohet Milan-it për të ulur sado pak shumën prej 150 milionë eurosh që ata vlerësojnë ish-lojtarin e Lille-s. /Albanianpost.com
