Rritja e shpejtë e çmimeve dhe situata e tensionuar gjeopolitike kryesojnë listën e problemeve që evropianët i konsiderojnë si sfidat më të mëdha për Bashkimin Evropian.
Në të njëjtën kohë, perceptimi pozitiv i BE-së ka arritur maksimumin e tij që nga viti 2009.
Këto kanë qenë rezultatet e sondazhit të opinionit publik të Eurobarometrit të kryer në periudhën qershor-korrik 2022.
34 për qind e të anketuarve e shohin problemin më të madh aktual të BE-së te rritja e kostos së jetesës, 28 për qind te situata me burimet energjetike, 28 për qind te situata aktuale gjeopolitike.
51 për qind besojnë se situata në ekonominë e BE-së është aktualisht e keqe, dhe 64 për qind ndajnë të njëjtin mendim për ekonominë e vendit të tyre, dhe më shumë se gjysma janë të bindur se situata do të përkeqësohet në të ardhmen.
62 për qind e të anketuarve janë përgjigjur se ndjejnë ndikimin e luftës në Ukrainë në gjendjen e tyre financiare.
Në të njëjtën kohë, shumica absolute janë në favor të mbështetjes së Ukrainës, përfshirë me armë dhe sanksione, dhe për reduktimin e varësisë nga gazi rus.
65 për qind e të anketuarve janë optimistë për të ardhmen e BE-së, që është 3 për qind më shumë se periudha janar-shkurt 2022.
Perceptimi pozitiv i Bashkimit Evropian është 47 për qind dhe ka arritur nivelin më të lartë që nga vjeshta e vitit 2009 (36 për qind e perceptojnë BE-në neutralisht, 16 për qind negativisht).
49 për qind e të anketuarve janë më të prirur t’u besojnë institucioneve evropiane, 34 për qind – qeverive kombëtare.
Mbështetja për euron si monedhë e përbashkët ka arritur një maksimum historik: 80 për qind në Eurozonë dhe 72 për qind në BE në tërësi mbështesin ekzistencën e një hapësire të përbashkët ekonomike dhe një valute të vetme.
Sondazhi veror i Eurobarometrit u krye fizikisht ose online nga data 17 qershor deri më 17 korrik 2022.
Janë intervistuar gjithsej 26 mijë e 500 persona në të gjitha vendet anëtare të BE-së. /Albanianpost.com
