17 raste të vrasjeve janë evidentuar në Kosovë nga janari deri në shtator të vitit 2026, sipas të dhënave të Policisë së Kosovës. Shifra merr vëmendje të veçantë pas dy ngjarjeve të rënda në Gjilan, ku brenda pak ditësh humbën jetën tre persona.
Të dhënat policore tregojnë se nga rastet e evidentuara gjatë nëntë muajve të parë të vitit, 12 janë cilësuar si vrasje të rënda, ndërsa dy si vrasje nga pakujdesia.
Ndërkohë, gjatë gjithë vitit 2025, në Kosovë ishin regjistruar gjithsej 17 vrasje. Kjo do të thotë se numri i rasteve të evidentuara deri në shtator të vitit 2026 është i njëjtë me totalin e raportuar për tërë vitin paraprak.
Shqetësimi për sigurinë është shtuar edhe pas dy ngjarjeve tragjike në komunën e Gjilanit.
Rasti i parë ndodhi të premten në Livoç të Ulët, ku një burrë dyshohet se vrau bashkëshorten dhe vëllain e saj. Pas ngjarjes, ai u dorëzua në Polici, ndërsa ndaj tij u caktua masa e paraburgimit prej 30 ditësh.
Vetëm dy ditë më vonë, në fshatin Pogragjë, një baba dyshohet se i mori jetën djalit të tij. I dyshuari, sipas informatave të bëra publike, ndodhet ende në arrati.
Dy rastet në Gjilan, së bashku me shifrat e raportuara në nivel vendi, rikthejnë në fokus nevojën për parandalimin e dhunës, trajtimin me kohë të konflikteve dhe forcimin e mekanizmave të sigurisë. /RTKlive
