Figo sfidon Infantinon në FIFA? Zbulohen prapaskenat në UEFA
Komisioni Evropian synon të propozojë një kredi të re prej 45 miliardë eurosh për të ndihmuar Ukrainën, e cila do të sigurohej nga garancitë nga buxheti i përbashkët i Bashkimit Evropian.
Vlerësohet se buxheti i Ukrainës do të jetë i mangët me 70 miliardë euro vitin e ardhshëm dhe Komisioni Evropian është zotuar të mbulojë dy të tretat e kësaj shume dhe u ka bërë thirrje aleatëve të tjerë perëndimorë që të rrisin gjithashtu mbështetjen e tyre, shkruan Financial Times.
Sipas informacionit nga katër persona të njohur me planin, Komisioni do të paraqesë një propozim për huamarrje nga buxheti i BE-së shteteve anëtare të mërkurën. Modeli i financimit do të ishte i njëjtë me atë të përdorur për kredinë ekzistuese prej 90 miliardë eurosh për Kievin.
Fondet ishin menduar të mbulonin nevojat e Ukrainës këtë vit dhe vitin tjetër, por dëmet në rritje të luftës kanë krijuar një boshllëk shtesë financiar. Në kredinë e mëparshme prej 90 miliardë eurosh Republika Çeke, Sllovakia dhe Hungaria u përjashtuan nga pagesa e interesit.
Kredia e re prej 45 miliardë eurosh kërkon pëlqimin e të gjitha 27 shteteve anëtare. Megjithatë, të njëjtat tri vende, të shoqëruara nga Bullgaria, kanë njoftuar tashmë se nuk kanë ndërmend të marrin pjesë në financimin e ardhshëm për Ukrainën.
Ky qëndrim e shtyu kancelarin gjerman Friedrich Merz të kërcënonte të bllokonte marrëveshjen për buxhetin e BE-së për periudhën 2028-2034 javën e kaluar.
Ai po e kushtëzon marrëveshjen e tij me pjesëmarrjen e të gjitha shteteve anëtare në financimin e Ukrainës vitin e ardhshëm dhe në të ardhmen.
Gjermania është kontribuuesi më i madh në buxhetin e BE-së dhe donatori më i madh dypalësh evropian për Kievin.
Udhëheqësit e BE-së do të diskutojnë të dyja çështjet në një takim në Bruksel më 26-27 nëntor, me qëllim arritjen e një marrëveshjeje deri në fund të vitit. /KosovaPress/