Qeveritë dhe kompanitë e mëdha, përfshirë Amazonin, po marrin masa për të mbrojtur sistemet e tyre pas zbulimit të dy dobësive kritike të sigurisë në PHP, gjuhë programimi që përdoret nga shumë faqe interneti, shkruan BBC.
Kompania e sigurisë kibernetike Wiz vlerëson se rreth 70 për qind e internetit mund të jetë e prekur, shifër të cilën BBC nuk ka mundur ta verifikojë në mënyrë të pavarur.
Agjencia e Sigurisë Kombëtare e SHBA-së (NSA) ka paralajmëruar organizatat që përdorin PHP të përditësojnë menjëherë sistemet e tyre, ndërsa nëse kjo nuk është e mundur, t’i nxjerrin ato jashtë funksionit deri në zgjidhjen e problemit.
Si masë paraprake, disa shtete evropiane kanë mbyllur përkohësisht shërbimet e tyre publike online, ndërsa Wikipedia ka çaktivizuar pjesë të faqes së saj. Finlanda i ka rikthyer shërbimet online, ndërsa një agjenci holandeze e sigurisë kibernetike është sërish funksionale.
Amazon ka konfirmuar se ka zbuluar një përpjekje të hakerëve për të shfrytëzuar dobësitë, por ka bërë të ditur se faqet e saj vazhdojnë të funksionojnë normalisht.
Wiz i ka cilësuar këto dobësi si më të rëndat e zbuluara ndonjëherë nga inteligjenca artificiale, ndërsa OpenAI i ka përshkruar si një nga çështjet më të rëndësishme të sigurisë së kohëve të fundit. Qeveria britanike ka njoftuar se po shqyrton ekspozimin e mundshëm ndaj këtyre rreziqeve. /KosovaPress/
