​Dita e 26-të e protestës, studentët bëjnë thirrje për dorëheqje para Ministrisë së Arsimit në Tiranë

Me pankarta në duar dhe thirrjet “Dorëheqje” dhe “Poshtë diktatura”, studentët vijojnë sot protestën përpara Ministrisë së Arsimit në Tiranë.

Deri më tani, protesta po zhvillohet e qetë, pas disa momenteve të tensionit të regjistruara më herët, kur studentët kundërshtuan bashkimin e protestuesve të Partisë Demokratike në tubimin e tyre.

Ditën e sotme në kryeqytet janë zhvilluar dy protesta të ndara, njëra e organizuar nga studentët dhe tjetra nga Partia Demokratike.

Protestuesit e PD-së e nisën tubimin përpara Kryeministrisë dhe më pas marshuan drejt Ministrisë së Arsimit, me synimin për t’iu bashkuar studentëve. Megjithatë, këta të fundit e kundërshtuan një veprim të tillë dhe kërkuan largimin e grupimit demokrat, duke theksuar se protesta e tyre është e pavarur dhe nuk dëshirojnë përfshirjen e përfaqësuesve politikë.

Përplasjet verbale dhe tensionet zgjatën për disa minuta, por më pas situata u qetësua dhe studentët vijuan tubimin e tyre.

Kjo është protesta e 26 e studentëve, ndërsa edhe më parë ata kanë refuzuar eksponentë të politikës që t’i bashkohen. /RTSH/