Nga Ksamili te Alpet, “Skyscanner” promovon Shqipërinë si destinacionin më ekonomik për pushime
Administrata e presidentit amerikan, Donald Trump, ka propozuar një masë të re që synon ndalimin e kompanive ajrore kineze nga përdorimi i hapësirës ajrore ruse gjatë fluturimeve drejt dhe nga Shtetet e Bashkuara.
Sipas raportimit të agjencisë Reuters, propozimi ka për qëllim eliminimin e avantazhit konkurrues që aktualisht gëzojnë disa kompani kineze, si China Eastern Airlines, të cilat përfitojnë nga rrugë më të shkurtra mbi territorin rus – gjë që redukton ndjeshëm kohën e fluturimit dhe kostot e karburantit.
Në kontrast, kompanitë ajrore amerikane janë të ndaluara të fluturojnë mbi hapësirën ajrore të Rusisë që nga viti 2022, pas sanksioneve dhe tensioneve të shtuara midis SHBA-së dhe Moskës, të lidhura me luftën në Ukrainë.
Administrata Trump argumenton se ky disbalancë i jep kompanive kineze një përparësi të padrejtë dhe dëmton operatorët ajrorë amerikanë. Propozimi do të zbatohet vetëm për fluturimet me pasagjerë, ndërsa fluturimet mallrash nuk do të preken nga masa.
Ky veprim shihet si një tjetër përshkallëzim në luftën tregtare midis dy fuqive më të mëdha ekonomike në botë. Ai vjen pas vendimit të fundit të Pekinit për të vendosur kontrolle më të rrepta mbi eksportet e mineraleve të rralla, materiale të domosdoshme për sektorë të ndjeshëm në SHBA, si teknologjia dhe mbrojtja.
