Pas më shumë se 30 vjetësh, Formula 1 rikthehet në Afrikë

Formula 1 pritet të rikthehet në kontinentin afrikan, pasi Ruanda ka siguruar një marrëveshje 10-vjeçare për organizimin e një gare të kampionatit më të madh të automobilizmit.

Sipas njoftimit, Çmimi i Madh i Afrikës synon të bëhet pjesë e kalendarit të Formula 1 në fillim të viteve 2030, duke shënuar rikthimin e garave të këtij kampionati në Afrikë pas një mungese të gjatë.

Kjo do të jetë gara e parë e Formula 1 në Afrikë që nga viti 1993, kur kampionati zhvilloi Çmimin e Madh të Afrikës së Jugut në pistën Kyalami.

Gara do të zhvillohet në një pistë të re, e cila do të ndërtohet në Bugesera, rreth 40 kilometra në jug të kryeqytetit Kigali, pranë aeroportit të ri ndërkombëtar. Pista do të projektohet sipas standardeve të kategorisë së parë të FIA-s, të nevojshme për organizimin e garave të Formula 1.

Marrëveshja 10-vjeçare përbën një hap të rëndësishëm për ambiciet e Ruandës për të pritur një garë të Formula 1 dhe për ta vendosur vendin në qendër të vëmendjes së sportit ndërkombëtar.

Me këtë marrëveshje, Formula 1 synon të zgjerojë praninë e saj globale dhe të afrojë kampionatin me miliona tifozë afrikanë. Data e saktë e garës së parë dhe detajet e tjera të organizimit pritet të bëhen të ditura më vonë. /tvsyrivision/