Udhëheqësi iranian Mojtaba Khamenei thuhet se ka adoptuar masa ekstreme sigurie për t’i shpëtuar gjurmimit nga agjencitë e inteligjencës izraelite dhe amerikane, duke jetuar prej muajsh në fshehtësi dhe duke shmangur çdo përdorim të teknologjisë moderne.
Sipas një raporti të publikuar nga The Times, Khamenei nuk ka përdorur telefon apo kompjuter për rreth tre muaj. Në vend të tyre, ai komunikon përmes një rrjeti korrierësh, të cilët përcjellin mesazhe pa ditur përmbajtjen ose destinacionin përfundimtar të tyre.
Raporti, i cituar edhe nga Channel 14, pretendon se strukturat iraniane të sigurisë përdorin edhe sozi të liderit për të vështirësuar identifikimin e tij. Madje, sipas të njëjtave burime, edhe personeli që i shërben ushqimin nuk është gjithmonë në dijeni nëse përballë ka vetë Khamenein apo një prej zëvendësuesve të tij.
Rami Igra, ish-drejtues i një njësie të Mossadit, deklaroi se shmangia e teknologjisë e bën shumë të vështirë gjurmimin elektronik të liderit iranian, duke e detyruar inteligjencën izraelite të mbështetet kryesisht te rrjetet e agjentëve në terren.
“Mojtaba mund të mos përdorë telefon, por ai ka mënyra të tjera komunikimi, si mesazhet me shkrim. Korrierët thjesht përcjellin mesazhe nga një person te tjetri, pa ditur se çfarë përmbajnë. Nëse Mossadi do ta gjente, kjo do të ndodhte falë një burimi njerëzor”, u shpreh Igra.
Edhe burime të larta amerikane pranojnë se Irani mbetet një nga vendet më të vështira për operacionet e inteligjencës, për shkak të izolimit të tij dhe kontrollit të fortë të strukturave të sigurisë.
Një zyrtar amerikan, i cituar në raport, tha se inteligjenca amerikane ka kufizime të mëdha në Iran, ndërsa vlerësoi se shërbimet izraelite kanë krijuar një rrjet më efektiv informatorësh në terren.
Sipas raportimeve, Mojtaba Khamenei është larguar nga sytë e publikut që prej fundit të shkurtit, pas vrasjes së babait të tij, ish-udhëheqësit suprem Ali Khamenei, në ditët e para të luftës. Që atëherë, ai thuhet se ka ndryshuar vazhdimisht vendndodhjen, ndërsa siguria e tij është kthyer në prioritet absolut për strukturat drejtuese të Republikës Islamike.
Megjithatë, këto pretendime janë bazuar në raportime mediatike dhe nuk janë konfirmuar zyrtarisht nga autoritetet iraniane./express
