Mandl për samitin e Granadës: Mundësi e mirë për zgjidhje mes Kosovës e Serbisë

Komuniteti Evropian Politik (EPC) do të mblidhet këtë të enjte, në qytetin spanjoll të Granadës.

Deputeti austriak, njëherësh zëdhënës i politikës së jashtme i partisë OVP në Parlamentin Evropian, thotë se ky samit do të jetë një mundësi e mirë për zgjidhjen e konfliktit mes Kosovës dhe Serbisë.

“Presioni, i cili shpesh mund të gjurmohet në Rusinë e Putinit, po rritet në Evropë. Kjo kohët e fundit është bërë e qartë mes Armenisë dhe Azerbajxhanit dhe gjithashtu ndërmjet Kosovës dhe Serbisë. Kjo është ajo ku EPC ofron një mundësi për të gjetur zgjidhje. Është mirë që e gjithë Evropa është mbledhur rreth një tavoline, ose më mirë thuajse e gjithë Evropa. Sepse lëvizja për liri e Bjellorusisë nuk është ende e ftuar”, tha Mandl në një deklaratë me shkrim për media.

Komuniteti Politik Evropian u themelua në Pragë në tetor 2022 dhe sot në Granada janë të ftuar krerët e shteteve dhe qeverive të 47 shteteve. Përveç 27 anëtarëve të BE-së, janë të përfaqësuar edhe Islanda, Lihtenshtajni, Norvegjia, Zvicra, Mbretëria e Bashkuar dhe disa vende fqinje në Ballkanin Perëndimor dhe në juglindje të BE-së, duke përfshirë Kosovën, Turqinë, Armeninë, Azerbajxhanin e Serbinë. /Klankosova.tv