Ambasadori britanik, Jonathan Hargreaves vizitoi sot Qendrën Komunale të Numërimit në Sallën “1 Tetori” në Prishtinë, ku nga afër u njoh me procesin e numërimit të votave të zgjedhjeve të 7 qershorit.
Pas takimeve me përfaqësuesit e Komisionit Qendror të Zgjedhjeve dhe menaxhmentin e qendrës, ai vlerësoi punën e stafit të angazhuar në proces dhe shprehu besimin se numërimi do të përfundojë me sukses dhe transparencë, raporton Ekonomia Online.
“I jam shumë mirënjohës Kryetarit të Komisionit Qendror të Zgjedhjeve dhe menaxherit të kësaj qendre numërimi që më prezantuan me procesin e numërimit që po zhvillohet këtu. Është kënaqësi të shohësh hollësitë dhe detajet në të cilat numëruesit po kalojnë gjatë numërimit të votave. Dua t’i bëj homazh përpjekjeve të jashtëzakonshme të të gjithë këtyre njerëzve që bëjnë që këto zgjedhje të mbarëvajnë dhe garantojnë integritetin e tyre”, deklaroi Hargreaves.
Ai tha se puna e ekipeve të numërimit është sfiduese, por me rëndësi të veçantë për besueshmërinë e procesit zgjedhor.
“U uroj atyre suksese në atë që duket si një punë shumë e vështirë. Por unë vërtet shpresoj që ky proces të vazhdojë pa probleme dhe shpejt, në mënyrë që të gjithë të mësojmë për rezultatin dhe të gjithë të jemi të bindur te rezultati sa më shpejt të jetë e mundur. Kjo do t’i mundësojë vendit të kalojë në fazën tjetër, të formojë një kuvend, një qeveri dhe të zgjedhë një president. Faleminderit të gjithë atyre që janë të përfshirë në këtë proces dhe mezi presim të shohim se cili do të jetë rezultati”, tha ai.
Duke komentuar pjesëmarrjen e votuesve në zgjedhjet e 7 qershorit, Hargreaves tha se niveli i daljes në votime duket të ketë qenë më i ulët sesa pritej, por theksoi se ende është herët për vlerësime përfundimtare.
“Vërtet duket se pjesëmarrja ishte mjaft e ulët. Unë thashë edhe para zgjedhjeve se, nga bisedat me qytetarët, kisha përshtypjen se njerëzit ishin mjaft të lodhur dhe po përjetonin një lloj lodhjeje nga mbajtja e kaq shumë zgjedhjeve në një periudhë relativisht të shkurtër kohore. Dyshoj se kjo mund të jetë një nga arsyet që ka ndikuar në nivelin e pjesëmarrjes”, u shpreh ai.
Megjithatë, ai nënvizoi se procesi zgjedhor ende nuk ka përfunduar dhe se në rezultatet finale do të ndikojnë edhe votat që pritet të arrijnë nga diaspora dhe burime të tjera.
“Ne ende nuk i kemi marrë të gjitha votat dhe mendoj se është e rëndësishme të kujtojmë se Komisioni Zgjedhor duhet të pranojë dhe të përpunojë votat nga diaspora dhe burime të tjera. Ka ende një rrugë të gjatë për të bërë për të kuptuar se sa ishte në të vërtetë pjesëmarrja dhe, natyrisht, edhe më shumë rrugë për të bërë për të kuptuar se cili do të jetë rezultati përfundimtar i zgjedhjeve”, tha Hargreaves.
Ai përsëriti thirrjen për bashkëpunim ndërmjet partive politike pas certifikimit të rezultateve, duke theksuar rëndësinë e funksionimit institucional dhe respektimit të rendit kushtetues.
“Mesazhi im për partitë politike është i njëjtë siç ka qenë gjatë gjithë kohës. Është e qartë se, cilat do qofshin rezultatet e sakta të këtij procesi, do të jetë e nevojshme të ketë bashkëpunim mes partive politike. Ky vend ka një kushtetutë të fortë, e cila i ka shërbyer shumë mirë gjatë 18 viteve të fundit, dhe ajo kërkon që politikanët të punojnë së bashku për të mirën e vendit. Ata duhet të bëhen bashkë për të formuar një kuvend, një qeveri dhe për të zgjedhur një president. Kjo është ajo që shpresoj se do të ndodhë sapo rezultatet të bëhen të qarta”, shtoi ai./express
