Dana White zbulon se kur mund të rikthehet në kafaz Conor McGregor
Luis Figo, aktualisht këshilltar i UEFA-s, por gjithmonë i lidhur emocionalisht me Real Madridin, vlerësoi në një intervistë për “Radio Marca” nisjen e shkëlqyer të sezonit nga Barcelona, që ka marrë 21 pikë në 21 të mundshme në La Liga, me 31 gola të shënuar dhe 6 pikë avantazh ndaj Real Madridit: “E ka nisur shumë fort. Po fiton, po luan mirë, po shënon gola”.
Megjithatë, ai kujtoi: “Duhet të shohim se si do të zhvillohet sezoni, sepse është shumë i gjatë”. Portugezi vlerësoi edhe nivelin e skuadrave të La Liga-s: “Për futbollin spanjoll, sigurisht që është diçka e mirë”.
Figo tha se nuk e kishte parë Atlético Madrid-Real Madrid (2-0), pasi ndodhej në Zyrih, ndërsa nuk deshi të komentonte shumë kritikat e José Mourinhos ndaj arbitrimit: “Ka bërë atë që mendoi se duhej të bënte në atë moment. Nuk kam pse ta komentoj. Besoj se janë veprime personale dhe, nëse e ka bërë, është sepse ashtu e ka ndier”.
Për Real Madridin, që ndodhet 6 pikë pas kreut, Figo u shpreh: “Jam i sigurt se Reali do të luftojë deri në fund. Kjo është një garë që duhet të jetë e rregullt deri në maj. Do të ketë ulje dhe ngritje gjatë sezonit. Kur vijnë momentet e vështira, duhet të kesh pjekurinë dhe cilësinë për t’i kapërcyer dhe vazhduar përpara”.
Për “Topin e Artë”, votimi për të cilin mbyllet të hënën e ardhshme, Figo tha: “Ai që ka fuqinë për të vendosur është ai që voton. Duhet të presim të shohim çfarë do të ndodhë. Unë nuk votoj, ndaj nuk e kam këtë problem në kokë”.
Për Kylian Mbappé shtoi: “Gjithmonë është në një nivel shumë të lartë. Na ka mësuar të jetë një prej më të mirëve në botë dhe të shënojë gola”. /Telesport.al/
